DILI, STLTIMORLESTE.com – Kada Fulan Prezidente Republika (PR) Jose Ramos Horta fo apoiu ba labarik sira neebe hela iha Orfonatu Santa Clara, Ailok Laran.
Kestaun nee hatoo husi Xefe Kaza Sivil Prezidensia Republika, Jesuina Maria Ferreira Gomes ba jornalista sira iha Orfonatu Santa Clara, Ailok Laran, Kinta (18/12/2025).
Nia dehan, apoiu ba orfonatu Santa Clara nee laos deit natal mak Prezidente Republika fo apoiu lae, kada fulan Prezidente Republika liu husi servisu sosiedade sivil lori apoiu mai labarik neebe hela iha orfonatu liu husi selu propinas eskola no nesesidade neebe presiza.
“Tanba labarik sira iha orfonatu nee hamutuk 26 pesoas, iha labarik balun husi Aileu, Ossu, Dili neebe inan-aman laiha posibilidade selu labarik sira, no mos sira iha difikuldade iha uma hela ho inan-aman sira, entaun Prezidente Republika fo orientasaun lori sira mai tau iha orfonatu Santa Clara nee, depois sira nia nesesidade sira nee Prezidente mak fo apoiu hanesan sira ba eskola hahan prezidensia mak fo apoiu,” dehan Xefe Kasa Sivil nee.
Maizumenus kada fulan Prezidensia apoiu orsamentu hira mai labarik iha Orfonatu nee. Hatan ba kestaun nee Xefe Kasa Sivil nee hatete, depende ba labarik sira nia eskola kada fulan selu hira, selu tuir ida nee, maibe ajuda mos sosa sira nia ropa ho nesesidade seluk ida nee kordenasaun ho madre sira iha orfinatu.
Nunee mos Madre Leonie Manalu Franciscanae Filiae Santissimae Cordis Jesu et Mariae (FCJM) hatete, orfonatu nee simu labarik sira latuir kriteria maibe sira neebe presiza tebes tulun orfonatu nia odamatan nakloke hanesan labarik balun inan aman kompletu maibe laiha kbiit atu selu oan nia eskola mos iha no balun ona kiak, balu ho nesesidade espesial.
“Ami agradese boot tebes tanba ami hetan grasa husi aman Maromak liu husi labarik sira mai fo grasa baa mi, ami mos estuda husi sira oinsa mak bele haree labarik, laos sira mak estuda husi ami maibe ami mak estuda husi sira, ami buka hatene nia presiza saida tanba labarik kada pesoal diferente, no labarik sira husi begraud neebe lahanesan ami tenke estuda husi sira ami hetan grasa husi labarik sira ami kontente,” dehan Madre Leonie.
Nunee mos Madre Maria Antonia de Jesus (FCJM) hatoo agradese tebes ba Prezidente Republika, Jose Ramos Horta neebe mak apoiu orfinatu sira tanba tinan kotuk mos hetan parsel natal husi Prezidente no orfonatu nee, kada fulan hetan apoiu husi Prezidente Republika Jose Ramos Horta liu husi hahan nesesidade bazika.
“Fulan fulan ami hetan apoiu husi Prezidente liu husi hahan nesesidade bazika, nomos parte Prezidente nia haruka labarik nain 6 mak haruka mai iha Orfonatu maibe agora hela nain 4 maibe nain rua sai semana kotuk entau hela nain 4, ami hetan apoiu nee ba sira nain 4 nee hotu hotu husi Prezidente Republika ba nia privinas eskola no nesesidade sira nee Prezidente mak selu tanba nee husi parte ami nia ami agradese tebes tulun tomak husi Prezidente neebe mak tau matan ba ami liu liu foin lalais vizita ho nesesidade bazika maibe Tempu natal nafatin haruka parsel natal, ida nee orgullu boot tebes mai ami hetan tau matan husi Xefe Estadu,” katak Madre nee.
Iha biban nee Madre dehan, iha devosaun no kada loron sempre reza ba Prezidente Republika nomos Primeiru Ministru nomos donator sira neebe durante nee tulun sira, nunee saude diak nafatin hodi tau matan ba povu kiik sira neebe presiza tebes tulun.
“Ami iha orfinatu lokraik lokraik ami iha tersu hamutuk ho orfonatu sira sempre reza liu liu ami hakerek ona intensaun iha neeba permanente reza ba Prezidente, reza ba Primeiru Ministru, reza ba inan aman no ami nia kongregasaun, no intensaun lima nee loron loron sempre reza iha tersu lokraik ida nee permanente ona lokraik sempre reza no reza espesial ba donator sira liu liu Prezidente, Primeiru Ministru no sira neebe ajuda,” dehan Madre Maria.
Jornalista: Emerenciana Pinto
Editora: Carme Ximenes
