DILI, STLTIMORLESTE.com – Kadaver eis Komandante FALINTIL Rejiaun IV, Ernesto Fernandes ”Dudu” vizita ikus ba Kuartel Jenerál FALINTIL-Forsa Defeza Timor Leste (F-FDTL), Sede Partidu Demokrátiku (PD) no ikus ba Munisipiu Ermera hodi halao nia funerál.
“Ita halibur ho fuan todan hodi simu Komandante Dudu, ita nia eroi mai iha Kuartel Jeneral F-FDTL nian,” hatete Xefe Estadu Maiór Jenerál F-FDTL, Tenente Jenerál Domingos Raul “Falur Rate Laek” liu husi nia diskursu wainhira kadaver eis Komunidade FALINTIL Rejiaun IV, Ernesto Fernandes ”Dudu” vizita ikus iha F-FDTL Fatuhada, Dili, Kuarta nee (07/05/2025).
Nia tenik, Instituisaun F-FDTL ida neebe konsidera mos hanesan nia uma, uma neebe nia kontribui ho kosar no matan been, ho sakrifísiu lubuk ida hodi defende atu harii iha tempu susar nia laran.
“Nia aten barani, didikasaun no espiriitu servi nian, sei grava nafatin ita hotu nia memoria, liu-liu nia hahalok sira hotu durante nia jornada vida moris no fatin sira neebe nia servi ba,” nia tenik.
Nia informa, Komandante Dudu servi nasaun ho laran, ho nia sakrifísiu garante liberdade, tanba Komandante neebe nia personalidade notavel.
“Nia memoria sei sai hanesan valor neebe diak, no fo naroman ba ita nia dalan no inspira ita moris ho ate barani ho determisaun, nia istoria kontinua inspira ita atu sai sidadaun neebe responsavel, sidadaun neebe konsisten, sidadaun neebe dedikadu no liu-liu sai nasionalista no patriota hodi kontribui ba fortaleste ita nia independénsia nasional,” nia deklara.
Nia informa, hahalok diak sira nee merese ba Komandante Dudu ninia, sentidu gratidaun ba nia legál neebe nia husik hela, nunee mos ba sira hotu nia orasaun no sentidu solidariedade ba familia iha tempu susar ida nee.
Hanesan Xefe Estadu Maiór Jenerál F-FDTL nian oferese instituisaun ninia apoiu tomak, wainhira familia presiza atu fo onra no dignifika hahalok diak hotu neebe nia husik hela ba sidadaun hotu-hotu.
“Komandante Dudu maske ita boot laiha ona, maibe ita boot nia espiritu sei inspira ami ba nafatin, liu-liu ba oan sira agora servi iha instituisaun neebe nia abut mos mai husi FALINTIL, obrigadu ba ita boot nia aten barani no didikasaun,” nia deklara.
Entretantu Eis Komandante FALINTIL Rejiaun IV, Ernesto Fernandes ”Dudu” ho idade 79 anos, matebian mate iha sala ICU Hospitál Nasionál Guido Valadares (HNGV) tanba kauza moras strok Hemorasia, mate iha tuku 5:25 dadersan.
Aleinde nee Saudozu husi Munisípiu Ermera, matebian husik hela feen ho oan nain sia (9), husi nain 9 nee mane nain 6 feto nain 3.
(jen)
