DILI, STLTIMORLESTE.com – Tribunal Judisial Primeira Instansia Dili kontinua halao julgamnetu ba arguidu nain haat ho inisial SPSF, JS, AA no VCN, ligadu ho kaderneta pasaporte 20 lakon no mos sidadaun estranjeiru nain 3 neebe utiliza pasaporte servisu ho karimbu no viza falsu.
Antes nee Tribunal rona ona deklarasaun arguidu nain tolu, tanba nee iha julgamentu kontinuasaun loron Kinta (03/04/2025), Tribunal kontinua rona deklarasaun husi arguidu VCN, neebe momentu neeba asumi kargu hanesan Diretor Jeral Rejistu Notariadu.
Iha sala julgamentu laran arguidu deklara katak, faktus neebe iha balu loos no balu laloos. Arguidu deklara momentu neeba arguidu asumi kargu hanesan Diretor Jeral Rejistu Notariadu, no kona-ba termu entrega pasaporte servisu ho numeru serial hahu husi S0008001 too S00083300, ida nee arguidu iha konhesimentu. Kona-ba introdus numeru pasaporte ba iha sistema arguidu la iha konhesimentu, funsionariu iha Departamentu Pasaporte mak hatene.
Arguidu deklara, kona-ba kaderneta pasaporte lakon iha tinan 2019 nee arguidu la iha konhesimentu, tanba arguidu nia mandatu hanesan Diretor termina iha tinan 2017, inklui sidadaun nain tolu neebe utiliza pasaporte servisu arguidu la iha konhesimentu, banhira husi Inspesaun bolu ona mak arguidu foin hatene.
Arguidu deklara, pasaporte servisu neebe sidadaun estranjeiru nain tolu uza, ida nee deskonfia pasaporte falsu no pasaporte tolu nee lai sai husi Diresaun Notariadu nian, tanba arguidu rasik hanesan Diretor la asina.
Arguidu deklara, kaderneta neebe kompanhia hatama mai nee, mai kedan ho nia numeru, no kaderneta mai rai iha lojistika, atu foti kaderneta pasaporte tenke iha pedidu eskrita ka verbal husi Diretor mak funsionariu sira ba foti, no bainhira foti kaderneta pasaporte sira nee tenke rejista iha livru lojistika nian.
Arguidu deklara, atu tarata pasaporte servisu baibain simu pedidu husi Instituisaun mak foin bele trata, maibe kona-ba sidadaun nain tolu nee, iha arguidu nia mandatu seidauk simu pedidu ruma kona-ba ida nee, no arguidu la iha konhesimentu.
No tuir regra, Xefe Departamentu sira kada fulan tolu halo relatoriu ba arguidu, maibe momentu arguidu asumi knaar nee sira halo relatoriu, maibe iha relatoriu la koalia kona-ba pasaporte 20 lakon.
Arguidu deklara tan, kaderneta kuandu foti husi lojistika tau iha armariu ida, no save Xefe Departamentu mak kaer, se Xefe Departamentu halao hela knaar ruma ka reuniaun ruma bele entrega ba iha funsionariu neebe tau konfiansa ba.
Arguidu deklara tan, nunka asina pasaporte sira neebe lakon, inklui pasaporte servisu neebe sidadaun nain tolu utiliza hodi halao viajen.
No kona-ba pasaporte neebe lakon, la hateten kona-ba loron horas fulan no tinan neebe lakon, maibe dehan deit kaderneta pasaporte lakon, tanba nee arguidu mos la iha konhesimentu, kuandu inspesaun bolu ona arguidu foin hatene.
Rona tiha arguidu nia deklarasaun, Tribunal adia ba loron seluk hodi rona sasin sira.
Tuir akuzasaun neebe Juiza Prosesu Zulmira Auxiladora lee sai katak, arguida SPSF iha loron akontesimentu nia asumi kargu nuudar Xefe Deparatementu iha Diresaun Jeral Servisu Rejistu Notariadu Dili.
Arguidu JS iha loron akontesimentu nia hanesan Xefe Interinu ba Departamentu iha Diresaun Jeral Servisu Rejistu Notariadu Dili.
Arguidu AA iha loron akontesimentu hanesan funsionariu iha Departamentu Pasaporte. Arguidu VCN hanesan Diretor Nasional Rejistu Notariadu.
Iha loron 8 fulan Novembru tinan 2016, funsionariu Lojistika Ministeriu Justisa (MJ) ho naran F, halo termu entrega pasaporte servisu ho numeru serial hahu husi S0008001 too S00083300, simu husi arguidu AA responsável seksaun lojistika DNRN.
Iha loron refere funsionariu iha departamentu pasaporte ho naran SP nuudar Xefe Departamentu pasaporte, introdus numeru pasaporte ba iha sistema, pasaporte ho total 300 no nia deklara katak entre numeru 50008001 too S00083300, utiliza ona 88 no sei falta 212.
Iha loron 21 fulan Janeriu tinan 2019, DNRN detekta katak kaderneta pasaporte neebe entrega ho numeru serial hahu husi S0008001 too S00083300 iha kaderneta 20 (rua nulu) mak lakon ho numeru serial hanesan tuir mai nee. 0008120 too S0008125, total 6 (neen), S0008188 too S0008188, total 4 (haat), S0008226 too S0008235, total 10 (sanulu), kaderneta pasaporte servisu ho numeru serial refere lakon iha Departamentu Pasaporte.
Iha loron 2 fulan Dezembru tinan 2018, Embaixada Timor Leste iha Bangkok hatoo informasaun katak, iha sidadaun estranjeiru husi nasaun Mianmar nain 3 (tolu) utiliza pasaporte servisu Timor Leste hodi halao viajen ba iha UK, no Imigrasaun UK hapara sira nain 3 (tolu) iha UK tanba deskobre katak, laos sidadaun Timor Leste no detekta mos katak karimbu nomos viza falsu.
Pasaporte servisu RDTL neebe enkontra fali iha Sidadaun Mianmar refere ho numeru referensia hanesan tiur mai nee, S008227 emiti iha loron 03/11/2015, utiliza husi Yarred Yohnnse, S0008235, emiti iha loron 17/08/2016, utiliza husı Solomon Haile, 50008234, emitu iha loron 17/08/2016, utiliza husi Beila Asmrom, kaderneta ho numeru serial 3 (tolu) refere tama mos iha iha kaderneta neebe mak lakon ho total 20 (rua nulu). Pasaporte hotu hotu rai iha armari laran no xave armariu Xefe Departamentu mak lori.
Prosedimentu atu hetan pasaporte tenke lori dokumentus hanesan kartaun eleitora ou BI, sertidaun nasimentu RDTL nomos prienxe formulariu neebe mak preparadu. Maibe de faktu pasaporte servisu enkontra fali iha sidadaun estranjeiru neebe mak la halao servisu hanesan Asesor iha kualker Ministeriu no sidadaun nain 3 (tolu) utiliza atu ba halao servisu iha UK.
Situasaun refere akontese tanba falta kontrolu nomos la halo jestaun ho idiak ba servisu Notariadu nian husi responsavel pasaporte RDTL hodi fo impaktu kaderneta refere sidadaun estranjeriu mak utiliza.
Arguidu sira hanesan SPSF, JS, AA, nomos VCN, iha dever hodi halo jestaun ho diak ba servisu no interese serbisu publiku nian, maibe arguidu sira la halao diak serbisu Estadu RDTL neebe fo ona konfiansa ba sira ho konsekuensia passaporte 20 (rua nulu) mak lakon iha Dirasaun Servisu neebe mak sira haknaar aan ba.
Konsekuensia falta kontrolu la halo jestaun ho didiak ba servisu no interese Estadu nian mak iha sidadaun estranjeiru nain 3 apropria tiha kaderneta 3 hodi falsifika dadus nomos vistu no hamosu prejuízu ba iha Estadu RDTL nomos fo benefisia ho ema seluk.
Arguidu sira livremente de liberada halao aktu refere hatene katak, hahalok refere krime maibe sira la perkupa hodi hamosu konsekuensia refere.
Ho faktu refere arguidu SPSF, JS, AA no VCN, Hanesan autor material ba krime administrasaun da nossa tuir artigu 274 husi kodigu penal.
Hatan ba akuzasaun neebe iha arguida deklara katak, faktus neebe iha balu loos no balu laloos. Arguida deklara, kona-ba Termu entrega pasaporte no introdus numeru pasaporte ba iha sistema, arguida la iha konhesimentu, tanba momentu neeba arguida tuir hela formasaun iha Portugal.
Arguida deklara, momentu neeba arguida asumi kargu hanesan Xefe Departamentu tuir despaisu neebe iha, loron arguida la lembra ona, maibe iha fulan Agostu tinan 2016 too iha fulan Maiu tinan 2017. No arguida halo tiha dezlokasaun ba iha Portugal hodi tuir formasaun, no ba Portugal iha loron 5 fulan Novembru tinan 2016, fila fali husi Portugal iha loron 19 fulan Novembru tinan 2016, no arguidu JS mak asumi kargu hanesan Xefe Interinu iha loron 5 too iha loron 19 fulan Novembru.
Arguida deklara, atu zere no kontrola kona-ba tratamentu pasaporte ema nain hira mak halo, no ema nain hira mak selu tuir semana ida nian ka fulan nian, depois ikus kada fulan arguida mos halo relatoriu, maibe konaba utilizasaun sistema arguida la iha konesementu, no tekniku sira mak iha konhesimentu.
Arguida deklara, kaderneta pasaporte kuandu iha akizasaun hodi sosa no tama mai ba liu iha lojistika. No atu foti kederneta pasaporte, tuir regra Xefe Departamentu mak hatoo pedidu verbal ka eskrita ba iha lojistika, depois mak funsionariu sira ba foti iha lojistika, maibe funsionariu neebe foti sempre asina iha livru ajenda neebe iha. No kaderneta pasaporte dala ruma foti mai aplikante sira tarata la hotu, balu rai ba estok, no rai iha armariu ida pesoal neebe imprime funsionariu nain rua maka kaer save, no arguida rezeita momentu neeba laos arguida mak kaer save armariu nian.
Arguida deklara, antes ba tuir formasaun iha Portugal arguida seidauk halo pedidu ruma ba iha lojistika hodi husu kaderneta pasaporte, maibe tuir regra atu foti kaderneta pasaporte Xefe Departamentu mak halo pedidu ba iha lojistika hodi foti. No iha situasaun balu se Xefe Departamentu la iha fatin, ho situasaun urjensia funsionariu sira bele foti kaderneta pasaporte iha lojistika, maibe tenke asina iha livru boot kona-ba ajenda nian.
Hatan konaba numeru serie husi kaderneta pasaporte, arguida deklara kaderneta pasaporte uluk nee nia numeru serie iha kedan.
Arguida deklara, kona-ba kaderneta pasaporte 20 lakon nee, arguida la iha konhesimentu tanba momentu neeba arguida la asumi ona kargu hanesan Xefe Departamentu muda ona ba iha Diresaun seluk, no husi Inpesaun Jeral ba bolu arguida hodi husu informasaun mak arguida foin hatene kona-ba kaderneta pasaporte 20 neebe lakon. No kona-ba sidadaun estranjeiru nain tolu uza pasaporte servisu ho karimbu no viza falsu, ida nee arguida la iha konhesimentu.
Arguida deklara, tuir regra normal ema ida atu hetan pasaporte tenke iha BI, Sertidaun RDTL, no prienxe formulariu ba pasaporte komun nian. Kona-ba pasaporte servisu atu tarata kuandu ema ruma atu halao servisu Estadu nian ba iha liur husi Instituisaun halo karta diriji ba iha Diretor, depois Diretor hatun despaisu foin bele produs. Maibe iha arguida nia mandatu, seidauk iha ema estranjeiru ba halo pasaporte liu husi pasaporte servisu.
Arguida deklara, durante nia mandatu sempre iha diskusaun ba servisu sira, no orienta funsionariu sira halao servisu hetan asinatura husi Xefe Departamentu no hetan orientasaun husi Diretor.
No kaderneta pasaporte kuandu produs ona sai pasaporte, la liu ona husi Xefe Departamentu, maibe ba liu iha Diretor hodi asina.
Kona-ba kaderneta pasaporte 20 neebe lakon, arguida deklara tan, kuandu Inspesaun Jeral bolu arguida hodi husu informasaun, arguida la ba verfika livru ajenda neebe iha, tanba muda ona ba diresaun seluk, maibe iha arguida nia mandatu halo jestaun arkiva. Kona-ba pasaporte emite ba sidadaun estranjeiru nain tolu arguida la iha konhesimentu, tanba tuir formasaun iha rai liur, kuandu diresaun Inspesaun bolu mak arguida foin hatene.
Iha sala julgamentu arguidu JS deklara katak, momentu neeba nia asumi knar hanesan xefe interinu, maibe durante asumi kargu nee, nunka halo pedidu ba iha lojistika hodi husu kaderneta pasaporte.
No tuir arguidu nia hatene, regra atu foti kaderneta pasaporte tenke pedidu husi Xefe Departamentu ba iha lojistika, kona-ba kaderneta lakon, arguidu la iha konesementu konaba ida nee. No baibain kaderneta passaporte tau iha brankas, no halo pedidu foti mai produs ona sai pasaporte tau iha armariu ida, maibe se mak kaer savi arguidu la iha konesementu.
Arguidu deklara, kona-ba sidadaun estranjeiru nain tolu uza pasaporte servisu no karimbu falsu, nia la iha konhesimentu. No tuir arguidu pasaporte servisu tuir regra imite deit ba iha funsionariu Timor Oan neebe halao servisu iha estranjeiru.
Arguidu deklara, kargu interinu asumi kuaze semana rua deit, no momentu neeba kaderneta pasaporte iha hela tanba nee arguidu la halo pedidu hodi foti kaderneta passaporte, no nia mandatu, nia la halo relatoriu ruma.
Arguidu AA hanesan funsionariu deklara katak, momentu neeba kaderneta pasaporte hotu, tanba nee arguidu ba informa verbal ba iha lojistika hodi foti kaderneta passaporte, no xefi interinu maka haruka arguidu ba maibe verbal deit la ho eskrita ida.
Arguidu deklara, nia ba foti senhor F maka entrega kaderneta pasaporte kaixa tomak no isolasi metin, arguidu mos asina ho livru neebe lojistika fo. No lori kaderneta nee ba entrega iha sira neebe toma konta konaba produs passaporte, no funsionariu nain rua maka simu.
Arguidu deklara, kona-ba pasaporte lakon mos arguidu la iha konhesimentu, no kona-ba ema nain tolu estranjeiru utiliza pasaporte servisu nia la iha konhesimentu hotu, kuandu inpesaun bolu ona arguidu foin hatene.
Arguidu deklara, save armariu neebe tau passaporte tuiele arguidu nia hatene xefe departamentu maka kaer, kuandu Xefe Departamentu ba tuir tiha formasaun xefe interinu maka kaer fali save. Atu produs pasaporte ida sei liu husi verifika, hatama sistema, hasai foto no faze produsaun.
Audensia julgamentu nee prezide husi Juiz Kolektivu, Zulmira Auxiliadora, Arjentino Nunes, Ivan Patricinio Suritay Gonsalves, Ministeriu Publiku reprezenta husi Prokuradora Lidia Soares, arguidu sira hetan asistensia legal husi Defensor Publiku nain rua, no Advogada Privada nain ida.
(ter)
