DILI, STLTIMORLESTE.com – Autor sira neebe deskonfia naok motor foin lalais komunidade Intelijensia detein, tenke liberta hikas tanba sira kaer laos iha flagrante delito.
Dehan Fontes Konfirmadu ida ba STL, iha Tribunal Dili, Sesta (08/11/2024).
“Sira nee laos iha flagarante delito, sira nee hamutuk hela iha fatin neeba hemu hela tua Polisia Intelijen sira mak iha indikasaun katak, labarik sira naok motor mak hamutuk hela, tanba nee mak sira kaer, kaer nee laos sira halo hela aktu ruma, maibe sira tur hamutuk hela, no aktu neebe sira halo antes tiha ona,” dehan Fontes Konfirmadu nee.
Fontes nee hatutan, kaer tiha autor sira nee mak husu sira hodi ba foti motor sira nee, no hatudu motor balu nia mesin neebe sira sobu hotu no hakoi.
Krimi ba nafatin krimi Furtu, maibe sira nee laos hotu-hotu, tanba balu kolega mak bolu malu ba hemu hamutuk deit nee, no sira labele ona submete mai iha prosesu Sumariu no mos Primeiru Interogatoriu.
“Agora titular ba prosesu ida nee nia mak haree no promove fali mandadu detensaun foun, indentifikadu ba sira nain 12 laos hotu-hotu, sira nee mak sei promove mai Tribunal, maibe depende ba Prokurador titular,” dehan nia.
Fontes nee sublina, Polisia haruka sira fila razaun tanba sira laos iha flagarante delito, tanba sira hemu hamutuk hela balu laos autor naok motor, naok nee iha maibe antes ona, indikasaun motor naok tau hela iha neeba sobu rahun hotu, intelijen sira hatene ona, no buka sira durante nee la hetan, haree sira hemu hamutuk, tanba nee sira neebe la naok mos Polisia foti hotu.
Signifika katak, ida nee laos flagarante Delito mak Polisia liberta sira, maibe Polisia haruka ona autu notisia ba iha Prokurador titular nia liman hakarak lori sira mai iha Tribunal, Prokurador titular tenke estuda fila fali se se mak envolve no se se maka la envolve, depois mak husu mai iha Tribunal hodi hasai mandadu foun.
Nia dehan, autor sira neebe Polisia kaer nee, iha nain 12 neebe indentifika hanesan autor prinsipal, no sira nee laos foin ba prosesu ida nee, iha mos prosesu seluk rejistu ona iha Prokurador antes nee.
Kona-ba motor sira neebe foti, Prokurador turnu halo ona validasaun ba objektu aprendidu, motor balu plat la iha, balu mesin la iha.
Tuir informasaun neebe jornalista STL hetan, feto nain tolu neebe Polisia detein, sira mos hatoo ona keixa ba iha Prokurador, tanba tuir informasaun katak sira hetan agresaun husi Polisia.
(ter)
