DILI, STLTIMORLESTE.com – Ministeriu Publiku (MP) iha alegasaun ba krime ameasa no arma branka, solisita ba iha Tribunal atu kondena arguidu inisial CCM ho prizaun efetivu.
Iha alegasaun nee Prokuradora Bemvinda do Rojario deklara katak, kona-ba krime ameasa priense, tanba arguidu lori tudik tenta atu sona ba lezadu nia isin, maske la kona maibe halo lezadu tauk.
Prokurador deklara tan, konaba krime arma brankas mos priense, tanba arguidu kaer tudik iha liman.
Prokuradora deklara, arguidu hanesan ema neebe gosta konsumu tua, no problema nee nia hun tanba rai, no antes nee mos iha ona prosesu ida hasoru arguidu, ligasaun ho rai.
Tanba nee Prokuradora konsidera atu halo prevensaun iha futuru, solisita ba iha Tribunal Kolektivu atu aplika pena prizaun tinan tolu (3) fulan neen (6) efetivu ba iha arguidu.
Enkuantu husi parte defeza nian deklara katak, konaba krime Arma Branka no Ameasa la prense. Tanba defeza konsidera, se arguidu tenta ta ba lezadu tanba sa momentu neeba lezadu la halai, maibe lezadu ses an deit.
Ho nunee Defeza konsidera la priense ba iha krime rua, hodi husu Tribunal absolve arguidu husi krime neebe iha.
Rona tiha alegasaun, Tribunal adia ba loron seluk hodi tama ba iha desizaun.
Iha indisus sufisiente katak, iha loron 31 fulan Agusto 2021, tuku 01:10 wainhira lezadu ESV toba dukur hela iha nian uma iha Bebora Dili, derepente arguidu CCM gas motorizada makas iha lezadu nian uma oin hodi halo provokasaun.
Tanba nee lezadu hader ba hare, arguidu kaer hela tudik iha nia liman atu sona lezadu, maibe lezadu liki tiha arguidu nia liman hafoin lezadu halai ses an tiha husi lokal.
Konsekuensia husi arguidu nian hahalok nee, halo lezadu sente tauk no trauma. Motivu husi problema nee, tanba problema anterior neebe arkivadu ho NUK.0208/2017.PNSIC.
Arguidu CCM komete krime nee ho voluntaria, livre no konscientemente, arguidu hatene katak hahalok lori tudik atu sona lezadu nudar hahalok neebe lei bandu, maibe arguidu halo nafatin hodi kontra lei.
Tanba nee konstitui arguidu CCM nudar autoria material ba krime Ameasa no mos utilizasaun ba arma Branka tuir artigu 15, no lei numeru 5/2017 konaba Regime Juridiku Relativo Pratika Artes Marciais, Rituais, Armas Brankas, Rama Ambon Kinta Alterasaun Kodigo Penal.
Prosesu nee, prezide husi Juiz Kolektivu, Ivan Patrocenio, Zulmira Auxiladora, Arjentino Nunes, MP reprezenta husi Prokuradora Bemvinda do Rojario, arguidu sira hetan asistensia legal husi Defensor Publiku Estajiadu nain ida.
(ter)
