BAUKAU, STLTIMORLESTE.com – Komisariu Komisaun Anti Korupsaun (KAK) deklara, tinan nee KAK aplika penalti ba kargu xefia sira iha territoriu nasional hamutuk rihun 2.
Komisariu KAK, Rui Pereira hateten, iha loron 25 Marsu KAK sosializa papel servisu ba kargu xefia sira iha Autoridade Munisipiu Baukau, nomos habelar informasaun espesifiku husi lei Nu. 07/2020 neebe orienta kargu xefia sira deklara rikusoin kada tinan bainhira akontese nomeasaun kargu xefia, tanba iha 2024 kargu xefia barak mak hetan penalti husi KAK, neebe kauza husi laiha konhesimentu.
Nunee tinan nee KAK sosializa papel servisu ba kargu xefia sira hodi bele hatene, tanba kada kargu xefia inisiu tinan husi loron 01 too 31 Janeiru obrigatoriamente deklara rikusoin neebe iha, tantu kargu xefia ativu no kargu xefia neebe termina ona mandatu.
Aleinde mos funsionariu neebe halao servisu iha Ministeriu Finansas, aprovizionamentu no enjinheiru tekniku iha terenu kada tinan 3 mos relata rikusoin ba estadu, tanba lei mak orienta.
“Tinan kotuk maluk sira neebe kona koima nee 400 resin, tinan nee husi rihun 8 neebe deklara, rihun 2 la kumpri, Baukau besik 100 kona penalti,” hateten Komisariu KAK ba jornalista sira iha salaun Sentru Konvensoens Vila Antiga, Tersa (25/03/2025).
Nia sublina, lei ba kargu xefia deklara rikusoin aprova iha 2020, nunee 2022 KAK hahu ona sosializa ba kargu xefia sira iha kada munisipiu, maibe impaktu husi mudansa Governasaun fo mos impaktu ba kargu xefia sira, tanba mudansa estrutura, nunee fo impaktu ba kargu xefia foun, tanba seidauk iha konhesimentu kona-ba lei deklara rikusoin.
Nia realsa, atu situasaun hirak nee la akontese ba kargu xefia sira mak KAK foti medida hodi sosializa lei deklara rikusoin nian ba kargu xefia sira iha nivel munisipiu hodi intende nunee bele lao tuir, tanba lei neebe estabelese kada kargu xefia tantu iha rikusoin barak ka oituan
tenke deklara.
Rui Pereira akresenta, formulariu neebe iha hodi kargu xefia sira prienxe no deklara rikusoin ho pergutas hamutuk 18 no kada tinan kargu xefia tenke deklara rikusoin aumenta ou menus, maibe bainhira KAK deskonfia kargu xefia ida komete korupsaun, KAK sei servisu hamutuk ho unidade finanseiru iha banku sentral no kontinua halo pedidu ba Ministeiru Publiku husu autorizasaun ba Tribunal hafoin KAK bele print sai dokumentu hodi tau karimbu nuudar provas aprezenta ba Tribunal.
(tom)
