DILI, STLTIMORLESTE.com – Komisaun Anti Korupsaun (KAK) halao sensibilizasaun lei numeru 07/2020 MPCC ba iha dirijenti Ministeriu Negosiu Estranjeiru no Kooperasaun (MNEK).
“Ami husi MNEK agradese ba Komisariu ho nia ekipa tomak neebe mai iha nee atu sosializa kona-ba lei prevensaun no kombate korupsaun, hau hanoin nee importante tebes mai mai, balu mak seidauk rejistu, no sosializasaun nee importante atu sira bele rejistu no responsabilidade ba idak-idak nia rikusoin nee importante,” dehan Sekretariu Jeral MNEK, João Freitas de Câmara ba jornalista sira iha salaun MNEK, Dili, Tersa (15/04/2025).
Nia hatutan, moris iha sosiedade evita korupsaun iha fatin servisu, tanba iha dirijenti barak hahu husi Sekretariu Jeral tun ba iha tekniku sira tun ba Diretor Jeral, Diretor Nasional, Xefe Departamentu sira no Diplomata Junior sira ba liur mos iha bens neebe sira hetan, no importante mos atu deklara rikusoin.
Oras nee daudaun diplomata sira neebe halao hela servisu iha rai liur hamutuk atus ida tolu nulu resin, iha kapital iha MNEK serka 20 ital, tanba iha Diretor Jeral, Diretor Nasionais ho Xefe Departamentu.
Hatan kona-ba dirijenti nain hira mak seidauk deklara rikusoin, nia parte dehan la iha konhesimentu kona-ba ida nee, maibe fila fali ba idak-idak nia aan, tanba balu seidauk iha informasaun, balu iha ona informasaun maibe presiza klarifikasaun, tanba nee mak Konvida Komisariu ho ekipa hodi esplika, responsabilidade saida mak sira halo, tanba inklui nia rasik foin hetan informasaun kompletu atu ba rejistu.
Iha fatin hanesan, Komisariu KAK, Rui Pereira dehan, atividade rutina KAK nia servisu atu partilha informasaun ba Ministeriu Instituisaun Estadu sira, liu-liu sira atu kumpri ba lei numeru 07/2020 nee atu deklara sira nia rikusoin.
“Iha MNEK dadus neebe ami iha ema 40 resin mak kona penalti, kona koima tinan ida nee nian,” dehan nia.
(ter)
