DILI, STLTIMORLESTE.com – Komisaun Anti Korupsaun (KAK) antes nee bolu eis Xefe Suku Seloi Kraik, aktual Xefe Gabinete Prezidente Autoridade Munisipiu (PAM) Aileu, inisial GM lori mai iha edefisiu KAK hodi halo identifikasaun, tanba deskonfia ligadu ho kazu balu envolvimentu hanesan eis Xefe Suku.
Tuir Komisariu KAK, Rui Pereira katak, KAK halo servisu iha terenu liga ho prosesu ruma KAK la naran halo identifikasaun ba ema ruma, no prosesu nee liga ho Xefe Gabinete Autoridade Aileu nian, mak husi parte KAK nian halo identifikasaun.
“Identifikasaun nee atu asegura dokumentus ruma, dala ruma ita ba buka ema halo lakon tiha, tanba nee mak iha loron halo aprensaun haree mos ida nee, KAK hanesan Polisia Investigasaun Kriminal nian liu-liu ba kazu korupsaun, iha ligasaun mak ita halo servisu iha terenu nee,” dehan Komisariu KAK, Rui Pereira ba jornalista sira iha Palasiu Prezidente, banhira partisipa iha selebrasaun Isar Bandeira, Tersa (20/05/2025).
Komisariu hatutan, halo identifikasaun ligadu ho kazu ruma neebe deskonfia envolvimentu Xefe Gabinete hanesan eis Xefe Suku ida iha Munisipiu Aileu nian.
Afirma, konserteza iha iregularidade mak halo identifikasaun nee, maibe halao servisu bazeia ba keixa no informasaun balu neebe simu. No halo identifikasaun averiguasaun hotu mak iha provas sira sufisiente indisus krimi sei kontinua ba oin.
Reforsa, foin halo identifikasaun no Komisariu seidauk simu relatoriu kona-ba asaun neebe mak halo, baihira tama servisu sei simu relatoriu husi parte hirak neebe mak tun ba iha terenu nee.
Tuir informasaun neebe antes nee iha katak, iha loron Segunda (12/05/2025) KAK asegura Eis Xefe Suku Seloi Kraik, atual Xefe Gabinete Prezidente Autoridade Munisipal (PAM) Aileu, inisial GM iha nia knaar fatin hodi lori mai Edifisiu KAK Farol, Dili.
Asaun polisial nee lidera husi Xefe Unidade Informasaun no Seguransa (UIS), Euclides Vidal Madeira hamutuk ho investigador KAK nian nain 6. Objetivu husi asaun polisial nee hodi halo identifikasaun ba dirijenti refere ka lori nia mai presta deklarasaun durante oras 12 nia laran, relasiona ho indisius kazu balun neebe hatoo husi publiku mai iha KAK.
Investigador KAK asegura dirijenti GM iha oras 14:00 loraik iha nia servisu fatin no nia parte koopera diak tebes ho investigador sira hodi mai tuir prosesu identifikasaun.
Asaun polisial nee bazeia ba lei numeru 8/2009 kriasaun KAK, artigu 5 konaba kompetensia CAC, iha numeru 2, letra E neebe hatete “iha materia investigasaun kriminal, Komisaun iha kompetensia atu halao knaar neebe lei fo ba orgaun polisia kriminal hanesan halo identifikasuan no kaer.
(ter)
