DILI, STLTIMORLESTE.com – Relasiona ho prosesu Diretor Jeral ida nian husi Ministeriu Agrikultura no Peska (MAP) neebe Ministeriu Publiku arkiva, Komisariu Komisaun Anti Korupsaun (KAK) mos deklara laiha provas sufisiente.
“Identifikasaun sira nee KAK mak halo iha konkluzaun KAK nian katak, depois ita halo konfirmasaun ba dadus sira neebe iha ligasaun ho projeitu iha Ministeriu, projeitu rua iha Kuarentina no irigasaun la iha indisus ruma Diretor Jeral envolve iha laran,” dehan Komisariu KAK, Rui Pereira ba jornalista sira iha Farol, Kuarta (21/05/2025).
Nia hatutan, tanba nee mak ita nia konkluzaun iha investigasaun no hatoo ba Prokurador katak, Diretor Jeral neebe inisiu deskonfia envolve depois prosesu investigasaun termina, la iha krimi ruma mak nia envolve.
Sublina, entrega ona ba iha Prokurador no iha konkluzaun hateten katak, seidauk detata Diretor Jeral nee envolve krimi ruma, tanba haree informasaun neebe tama.
Ezemplu mai husi unidade finanseiru banku sentral nian, la iha orsamentu ruma mak aumenta iha nia mandatu. Hanesan mos iha KAK unidade neebe toma konta kona-ba deklarasaun rikusoin, la iha buat ruma mak hatudu ba nia orsamentu Estadu derepente nee sai.
Akresenta, iha ona relatoriu final no iha ona konkluzaun katak, la iha provas neebe mak forte atu lori Diretor Jeral nee ba hatan.
Antes nee Defensor Publiku, Fransisco Martins deklara katak, Ministeriu Publiku arkiva prosesu ida, tanba la iha provas sufisiente.
Iha prosesu numeru 00424 KAK TL razaun tanba saida mak Ministeriu Publiku halo arkivamentu, primeiru katak la iha indisus forte katak RSG la iha indisus katak, pratika krimi imputa ba nia liu-liu krimi korupsaun pasiva ajente publiku ho aktu ilisitu,” dehan Defensor Publiku.
Nia hatutan, depois KAK halo investigasaun haruka ba iha Ministeriu Publiku, no Ministeriu Publiku hanesan nain ba asaun penal, deside la iha provas no la iha indisus ida neebe forte hodi kontinua prosesu nee ba oin.
Sublina, Ministeriu Publiku iha lejitimidade atu ordena arkiva ba prosesu nee, banhira sira indentifika katak, la prienxe ba elementus krimi, ho ida nee Ministeriu Publiku iha loron 28 fulan Fevereru tinan 2025 arkiva prosesu nee, hodi hatun despaisu arkivamentu.
Reforsa, buska neebe KAK halo iha momentu neeba, deskonfia RSG hanesan Diretor Jeral pratika krimi korupsaun pasiva no aktu ilisitu, hodi KAK liu husi mandadu Tribunal halo buska ba iha Ministeriu Agrikultura Floresta Peska, no nia kuntinuidade ba iha arkivamentu.
Afirma tan, sasan neebe buska foti nee, dokumentus publiku Estadu nian no sasan privadu hanesan leptop no kamera ida, maibe sira devolve fila fali ona objeitu prendidu sira nee ba iha nia nain.
Nunee, momentu neeba Funsaun Publiku hasai karta hodi suspende tiha RSG husi nia kargu hanesan Diretor, depois husi parte defeza hatama fali prosesu kontesiozu impugnasaun ba aktu judisial no, Tribunal deside RSG la sala no retoma fali nia knaar hanesan Diretor Jeral. Maibe kona-ba situasaun sira nee, prosesu administrativu kabe ba iha instituisaun defende ba iha konfiansa.
(ter)
