DILI, STLTIMORLESTE.com – Komisariu Komisaun Anti Korupasaun (KAK) iha ambitu aniversariu ezistensia KAK ba XVI, KAK mos lansa sistema keixa online ho naran denunsia publika, objetivu lo-loos nee para maluk sira labele hatama suratahan mai iha nasional, iha sira nia fatin deit informsaun sira bele haruka mai ona.
“Durante nee sira keixa balun mai husi sms, balun mai husi watshap no karta, maibe ho keixa online nee sira bele tau iha nia kronolijia diak liu atu ema publiku nee hatoo keixa direta ba Kak liga ho asuntu korupsaun,” dehan Komisariu KAK, Rui Pereira ba jornalista sira Sesta nee.
Nia hatutan, website ba keixa online nee mak denunsia publika CAC.tl, maneira atu rejista iha website kuandu klik mosu formulariu hakarak hatoo keixa mak uza deit bainhira mosu formulariu ense numeru Bilhete Identidade no naran ema neebe hatoo denunsia nee, inklui razaun denunsia.
Iha fatin hanesan, Diretor Investigasaun KAK, José Verdiál dehan, hahu husi ezistensia KAK iha 2010 too mai 2026 buat neebe sai dezafiu mak KAK menus rekursu umanu no laiha edifisiu propriu.
Nia dehan, iha tinan 2025 KAK rejista kazu 102, husi kazu sira nee pesoal KAK atu halo prosesu averiguasaun la too, tanba pesoal neebe atu halo averiguasaun nee iha nain neen deit iha Diresaun Investigsaun KAK nian.
“Hanesan tinan kotuk ami rejista kazu 102 no keixa hamutuk 90, ami rekursu la too atu halo averiguasaun ba kazu no keixa sira nee, tanba husi kazu no keixa sira nee ami iha rekursu neebe limitadu, tanba iha investigasaunn iha ema nain neen deit,” dehan nia.
Hatutan tan, atu rekruta ema, maibe ema sira atu mai tuur iha neebe, tanba KAK seidauk iha edifisiu propriu nee sai dezafiu ba KAK.
Nia sublina, ba oin esforsu atu tau konsiderasaun ba asuntu sira nee, nunee fo atendimentu publiku ba komunidade ho diak liu tan.
(ter)
