DILI, STLTIMORLESTE.com – Komisaun Anti Korrupsaun (KAK) realiza sorumutu ho pontu fokal sira, atu partila rezultadu kona-ba avaliasaun relatoriu segundu siklu neebe mak Nasaun Unidas Kontra Korrupsaun (UNCAC) halao mai Timor Leste.
“Enkontru ida ohin pontu fokal sira hotu husi Ministeriu no Instituisaun Estadu sira neebe mak iha KAK nia lista, partisipa hodi bele kontribui ba avaliasaun neebe mak nasaun rua halo mai ita, Marshall Islands no Bulgaria, ida nee normalmente ema halo mai ita no ita mos halo ba nasaun seluk,” dehan Komisariu KAK, Rui Pereira ba jornalista sira iha salaun MNEK, Kuarta (20/11/2024).
Nia hatutan, nasaun Timor Leste oinsa UNCAC nee Governu no Estadu implementa ho diak ka lae, maibe Estadu no Governu halo mudansa lubuk boot ona, Kodigu Prosesu Penal foun iha ona, no lei kona-ba MPCC asset deklarasaun husi kargu xefia sira, no ida nee parte ida oinsa Estadu Timor Leste kumpri, rekezitu sira neebe iha UNCAC hatete.
Importante iha setor Justisa mak koalia kona-ba lei ida asset recover, tanba nee koruptor sira neebe prosesu too iha Tribunal presiza sasan sira nee Estadu tenke foti, lei mos tenke iha.
Tanba uluk proposta draf nee iha, maibe kaduka iha Parlamentu ka Konselhu Ministru, tanba nee ho Visi Ministru neebe iha oinsa lei sira neebe liga ho sasan sira nee, asset recover mos importante no mos lei sira seluk neebe bele kontribui ba implementasaun UNCAC ninian.
Maibe tinan oin nasaun rua nee sei konfirma kona-ba saida mak hakerek iha relatoriu laran nee, no KAK sei organiza Instituisaun sira nee halibur hamutuk, atu nasaun rua neebe mai nee fasil atu halo diskusaun ho sira, nunee tinan oin fulan Maiu sira sei mai.
Iha fatin hanesan, Visi Ministru Justisa, Paulo Remedios dehan, Governu iha intensaun atu halo alterasaun ba modelu foun.
“Governu iha intensaun atu halo alterasaun implementasaun ba modelu foun no rekomendasaun neebe simu husi Komisariu KAK,” dehan nia.
(ter)
