DILI, STLTIMORLESTE.com – Komisariu Komisaun Anti Korrupsaun (KAK), Rui Pereira hatete, atu komemora loron Internasional Anti Korrupsaun iha loron 9 fulan Dezembru, KAK sei iha atividade balu hanesan halao inspesaun ba projetu neebe halo semiteriu Santa Kruz.
“Primeiru sei halo vizita ba Instituisaun Estadu sira, sei tau poster no stiker balu sei fahe, sei halo monitorizasaun ba projeitu sira estadu nian iha Dili laran, sei haree projetu Semiteriu Santa Cruz, estrutura KAK parte Inspesaun no Monitorizasaun sei haree,” dehan Komisariu KAK, Rui ba jornalista sira iha Edefisiu KAK, Kinta (21/11/2024).
Nia hatutan, ho vizita KAK nian atu hatudu sentidu ida katak, kompanhia sira neebe hetan oportunidade hodi kaer projetu estadu nian tenke aselera, tanba rai mos udan ona atu kumpri ba lei Medida Prevensaun Kombate Korrupsaun (MPCC) numeru 7/2020 katak, emprezariu sira neebe hetan fiar husi Estadu, sira tenke jere projetu sira nee ho responsabilidade.
Husi vizita nee mak iha informasaun ruma katak, presiza halo asaun ruma KAK mos bele iha informasaun atu rekomenda ba Ministeriu kompetente, tanba sira iha poder prevensaun nian, se iha buat ruma halo relatoriu haruka ba iha Ministeriu neebe mak iha kompetensia foti desizaun atu obra sira nee bele iha nia finalidade.
Iha mos atividade kampanha publiku liu husi Kanal media sira, atu fo informasaun hodi partilha ba publiku. No sei halo aprezentasaun estudu subensaun publiku nian ba iha Ministeriu Juventude Desportu, no estudu nee lao iha eis Komisariu Sergio Hornai nian, maibe iha Komisariu nia mandatu konklui estudu nee atu rezultadu estudu saida mak rekomenda iha neeba, Ministru Juventude Desportu bele tau iha konsiderasaun.
KAK sei organiza seminariu nasional kona-ba anti korrupsaun nian neebe sei realiza iha loron 9 fulan Dezembru, konvida Prezidente Republika sei halo abertura, haruka konvite ba iha PN no Prezidente Parlamentu tempu iha bele sai hanesan orador, kona-ba saida mak sira bele halo hodi prevene no kombate korrupsaun, no sei konvida mos orador balu atu haree kona-ba asuntu KAK nian.
Iha fatin ketak, Akademiku UNTL, Rafael de Jesus dehan, KAK nia papel importante atu kontrola mos projetu sira neebe seidauk termina.
“Hanoin KAK nia papel importante tebes, tanba nee sira mos bele halo vizita ba iha projeitu balu neebe seidauk hotu, atu haree oituan kona-ba kuaza husi saida mak sira seidauk finaliza,” dehan nia.
(ter)
