DILI, STLTIMORLESTE.com – Komisariu Komisaun Anti Korrupsaun (KAK), Rui Pereira deklara, durante nee sira simu delegasaun kazu hamutuk sanulu resin neen (16).
“Ami simu delegasaun kazu sanulu resin neen 16, iha kazu 16 prosesu lao hela no iha kazu rua ka tolu mak iha ona nia finalidade no submete ba ona iha Prokurador nuudar titular ba prosesu,” dehan Komisariu KAK, Rui ba jornalista sira, depois seminariu loron Mundial Anti Korrupsaun iha MF, Segunda (09/12/2024).
Nia hatutan, depois mak Prokurador titular sei haree, prepara buat ruma liga ho kompetensia neebe sira iha, no Prokurador sira neebe kaer prosesu kazu korrupsaun prepara akuzasaun, no buat balu sente sei falta presiza haruka fali mai KAK hodi halo kompleta.
Maibe kona-ba kazu neebe haruka ona ba iha Ministeriu Publiku, Komisariu labele temi kona-ba kazu saida, no kazu sira neebe sei iha KAK prosesu lao hela.
Tanba nee ba oin ekipa sira sei ba iha terenu, halo servisu investigasaun no rekolha informasaun iha terrenu, labele temi Ministeriu neebe atu ba, tanba investigasaun tenke kumpri ba iha segredu justisa.
Iha fatin ketak, Akademiku UNTL, Rafael de Jesus dehan, KAK tenke halo invetigasaun ba kazu sira neebe iha, atu evita labele akontes tan.
“KAK nia papel atu kombate korrupsaun, tanba nee tenke halo investigasaun ho diak ba kazu sira neebe iha, atu ba futuru bele prevene aktu nee,” dehan nia.
(ter)
