DILI, STLTIMORLESTE.com – Relasiona ho preokupasaun sosiedade balu nian kona-ba aimoruk balu neebe sai arbiru, atu evita iha futuru labele akontese tan hanesan nee, Komisaun Anti Korupsaun (KAK) sujere Institutu Nasional Farmasia no Produtu Mediku (INFPM) atu kria sistema scan barcode.
Tuir Komisariu KAK, Rui Pereira katak, atu garantia aimoruk labele sai arbiru, tenke monta sistema scan barcode.
“Aimoruk sira neebe sosa mai nee, buat ida importante tau barcode, atu nunee labele lemo lemo iha fatin seluk,” dehan Komisariu nee ba jornalista sira iha Kampu Alor, Tersa (26/11/2024).
Nia hatutan, fasil ema bele lori sai aimoruk bele akontese, tanba nee rekomenda atu tau CCTV, no diak liu atu asegura aimoruk sira nee mak tau barcode, atu nia lori sai sem autorizasaun buat nee lian.
Nia esplika, rekomenda hela atu aimoruk neebe Governu sosa, diak liu tau barcode.
Iha fatin hanesan, Diretor Ezekutivu INFPM, Virgido Simiao de Deus dehan, ekipa sei haree no sei kontaktu ho kompanhia balu neebe iha sistema nee atu bele instala.
“Agora ekipa buka hela sistema neebe iha, no ita iha kontaktu ho kompanhia balu neebe iha sistema ida nee, atu bele instala sistema nee iha nee, atu hafasil kontajen, no aimoruk sai tenke tau barcode prepara hela,” dehan nia.
Nia hatutan, se la implementa iha fulan Dezembru, Janeiru ba oin sei buka kompanhia ruma halo kontratu, hodi instala sistema nee.
(ter)
