DILI, STLTIMORLESTE.com – Visi Primeiru Ministru, Ministru Koordenador ba Asuntu Ekonomia no Ministru Turizmu Ambiente, Francisco Kalbuadi Lay akompanha husi Ministru Komersiu Industria (MCI), Nino Perreira inklui emprezariu Timoroan halao lansamentu ba fabrika produtu bebidas husi kompanhia Suhurama Developer.
Ministru Komersiu Industria (MCI), Nino Perreira hateten, governu orgulhu tebes ho emprezariu Timoroan sira, tanba iha ona komitmentu neebe boot atu halo investimentu produsaun bebidas iha TL.
Tanba nee IX Governu Konstitusional prontu apoiu emprezariu Timooan sira atu loke iha investimentu iha rai laran hodi kontribui ba dezenvolvimentu nasaun.
“Ohin ita halo lansamentu ba fabrika bebidas neebe halao husi Kompanhia Suhurama Developer. Ida nee hanesan fabrika bebidas ho eskala media neebe mak iha TL, neebe ita orgulhu tebes ho inisitiva no komitmentu katak ita Timoroan mos bele loke investimentu ida nee,” hatete MCI, Nino Perreira ba jornalista sira iha Aldeia Moris Foun, Suku Komoro, Tersa (26/11/2024).
Governante nee hatete, investimentu hatudu vontade ida husi emprezariu Timoroan sira neebe hakarak kontribui direita ba prosesu dezenvolvimentu ekonomia no loke kampu servisu ba Timoroan sira iha rai laran.
Iha fatin hanesan, Diretor Kompanhia Suhurama Developer, Ricardo Cardoso Nheu katak, produtu bebidas neebe kompanhia Suhuruma produs mak hanesan tanjarina, teh botol, susu ben, strawberry no seluk tan.
Nia dehan, produtu bebidas neebe sira produs nee material produtu barak sira sei hola husi nasaun seluk, tanba kuantidade produsaun iha rai laran sei menus.
“Produtu neebe iha nee balun ita hola iha rai laran no balun ita hola husi rai liur, tanba hanesan strawberry iha ita nia rain seidauk iha, pasiensia ita tenki hola iha rai liur,’’ dehan Nheu.
Produtu neebe sira produs provizoriu sei faan baratu liu iha rai laran kompara ho produtu importadu sira neebe oras nee faan hela iha merkadu.
Entrentantu trabalhador Timoroan neebe oras nee servisu iha Kompanhia Suhurama Developer hamutuk ema nain 30 resin, maibe kompanhia planu sei rekruta trabalhador too 100 resin.
(alb)
