DILI, STLTIMORLESTE.com – Foinsae presiza prepara aan, tanba futuru nasaun iha joven sira nia liman, no presiza aprende tuir atitude husi lider Kay Rala Xanana Gusmão ho Jose Ramos Horta, nunee lori rai nee ba oin.
Lia hirak nee hatoo husi Visi Primeiru Ministru, Ministru Koordenador Asuntus Ekonomiku no Ministru Turizmu no Ambiente, Francisco Kalbuady Lay liu husi nia diskursu iha Palasiu Prezidensial Nikolao Lobato, Bairo Pite, Kinta nee (26/06/2025).
Nia hatete, lider nain rua hanesan Primeiru Ministru Kay Rala Xanana Gusmão ho Primeiru Ministru iha vontade boot atu dezenvolve rai nee, maske idade ona maibe nafatin iha espiritu lori rai ba oin, tanba nee foinsae sira presiza prepara aan tuir ezemplu lider nain rua, tanba futuru nasaun iha joven sira nia liman.
“Rai ida nee presiza tebes dezenvolvimentu ba iha infreaestrutura importante maibe dezenvolvimentu ema, liu-liu atividade sira ba joven kala sira sente katak hau nee nain ba rai ida nee, hau sente katak rai ida nee hau nia rai doben duni, Amu Papa nia liafuan neebe dehan fraternidade humana ita sente ho atividade sira hotu-hotu atu katuas ka ferik labarik ate bebe, no foinsae sira sente katak sira nia tasi hau nia Timor, no Timor mak hau nia rai hau nia doben mak Timor,” dehan Visi PM Kalbuady.
Realiza workshop partisipa husi peritu lubuk ida husi rai liur no lokal ho komunidade no sosiedade sivil, obrigadu ba parte hotu nia kontribuisaun, TL hetan ema ida neebe loron kalan tau matan hela hanesan PR Horta.
“Hau mak Prezidente karik hau haree deit hau nia servisu hanesan Xefe Estadu, halo hau nia servisu diplomasia seguransa buat sira nee maibe nain ida naran Jose Ramos Horta ho Xanana nee ita haree katak hau dala barak sente maibe membru Governu sente ka lae, atividade ruma ita seidauk too fatin sira too uluk ona, atividade desportu ka dahur fali sira nain rua iha neeba,” katak Visi PM.
Iha biban nee nia mos husu joven sira atu aprende tuir atitude neebe halo husi lider nain rua hodi implementa iha futuru, tanba nasaun atu ba oin iha joven sira nia liman.
“Ita aproveita ba ita hetan lider ida hanesan nee ita sira sei joven, no imi sira be nurak nee ita hatete katak futuru rai ida nee iha ita boot sira nia liman, prepara aan ba konsentra aan ba ho vontade tomak ho ezemplu tomak sira nain rua fo ba ita hotu, mai ita hotu kaer liman hamutuk,” katak nia.
Nunee mos Visi Primeiru Ministru, Mariano Asanami Sabino hatutan, ema hotu presiza sai nain ba rai ida nee.
“Tenke sai nain ba rai ida nee no iha obrigasaun no iha responsabilidade ba mehi eroi sira nia, nunee bele realiza tuir mehi eroi sira nia,” katak nia
.
Nunee mos Padre Richardo Pasang, SVD husu foinsae nafatin aprende hodi prepara aan nafatin tanba rai nee ba oin sei iha joven sira nia liman.
Atu lori nasaun ba oin presiza ema neebe iha matenek, tanba foinsae sira nafatin aprende no estuda makaas, nunee futuru troka lider tuan sira hodi lori rai no povu nee ba oin ho prosperu.
(eme)
