DILI, STLTIMORLESTE.com – Embaixador Extraordinariu no Plenipotensiariu Timor Leste ba Suisa, Antonio da Conceição Kalohan hatete, Jornal Suara Timor Lorosae (STL) fo kontribuisaun makaas ba dezenvolvimentu demokrasia iha Timor Leste.
Embaixador Antonio da Conceição Kalohan hatoo lia hirak nee ba STL iha Zurich, Tersa (27/01/2026).
Nia dehan, hatoo parabens ba Jornal STL neebe sei selebra nia aniversariu iha loron 2 fulan Fevereiru.
Iha biban nee Embaixador TL ba Suisa hatete, Jornal Suara Timor Lorosae hanesan jornal tuan iha Timor Leste, nia kontribuisaun makaas ba dezenvolvimentu demokrasia iha Timor Leste.
“Jornal STL lian Timor nia halo aniversariu iha dia 1 Fevereiru, hau hakarak aproveita oportunidade ida nee hanesan Sekretaria Jeral Partidu Demokratiku, hau seidauk sai husi Sekretariu Jeral, hau nafatin hela ezerse funsaun politiku diplomatiku nia iha nee, hau hatene katak STL mos fo kontribuisaun ba dezenvolvimentu demokrasia iha Timor Leste,” katak Embaixador.
Diplomatiku Timor oan nee hatete, Jornal STL hanesan jornal primeiru neebe eziste iha Timor Leste, neebe fo ona kontribuisaun makaas liu husi fahe informasaun sira.
“Papel media nee importante tebes, STL hanesan jornal primeiru neebe eziste iha tempu indonezia, hau simu formasaun iha Kupang husi Valens hanesan wartawan Kompas nia neebe terkenal iha Indonezia, hau primeiru Jornalista neebe hola parte iha neeba, maibe servisu hau nia hanesan ema ativista NGO nia, hau husik tiha servisu ida jornalista nia, mais hau hakarak hatoo parabens ba STL hau dezeju nafatin katak imi nia lian mak povu nia lian, tanba nee hatutan no hasae nafatin povu nia lian no halo nafatin balansu ba servisu hotu neebe akontese entre parlamentu, governu hodi dudu nafatin prosesu dezenvolvimentu iha ita nia rai laran,” dehan Embaixador.
Iha biban nee Embaixador husu STL nafatin halao knaar ho profisionál, nunee halo kobertuta atividade hotu ho balansu no nafatin fiel ba kodigo etika jornalismu neebe mak eziste ona.
Jornal Suara Timor Lorosae eziste iha Timor Leste iha loron 1 fulan Fevereiru 1993 no oras nee atu selebra nia aniversariu ba dala 33.
(eme)
