DILI, STLTIMORLESTE.com – Nasaun Reinu Kamboja kontinua fo apoiu tomak ba Timor Leste (TL) nia Adezaun ba ASEAN.
Lia hirak nee hatoo husi Prezidente Senadu, Samdech Techo HUN SEN ba jornalista sira bainhira remata halo enkontru bilateral ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kinta (08/05/2025).
Prezidente Ramos Horta no Samdech Techo HUN SEN halao diskusaun bilateral produtivu, foka ba hasae kooperasaun iha area sira ho interese mutuu. Lider rua nee akompanha husi delegasaun nivel alto husi sira nia nasaun idak-idak, neebe reflete importansia nasaun rua fo ba kompromisu diplomatiku ida nee.
Bainhira Relasaun bilateral entre Timor Leste no Kamboja kontinua hametin marka ho kooperasaun no boa vontade neebe aumenta.
Kamboja sai ona nuudar kampeaun ida neebe forte liu ba Timor Leste iha rejiaun nee. Durante ninia Prezidensia ASEAN iha tinan 2022, Kamboja lidera akordu iha prinsípiu ASEAN nian hodi simu Timor Leste nuudar nia membru ba dala 11.
Samdech Techo HUN SEN hatete, nia haree Timor Leste iha progresu boot, espera katak tempu badak Timor bele sai membru ASEAN.
“Hau agradese ba ospitalidade kmanek neebe hatudu mai hau nia delegasaun. Hau haree progresu boot iha Timor- Leste dezde hau nia vizita dahuluk. Hau espera katak Timor Leste la kleur tan sei sai membru tomak ASEAN nian ho apoiu husi membru Estadu sira seluk. Ami nia diskusaun bilateral ohin lao ho produtivu, foka ba ami nia relasaun neebe bazeia ba konfiansa no amizade. Hau mós hatoo saudasaun kmanek no konvite husi Sua Majestade Liurai Norodom Sihamoni ba Prezidente Ramos Horta atu vizita Kamboja.” Katak nia
Iha biban nee, Prezidente Ramos Horta hatete, ho laran kmanek hatoo benvindu ba HUN SEN mai Timor Leste. Nuudar Libertador no Fundador ba Kamboja Modernu, HUN SEN iha similaridade notável ho Primeiru Ministru Xanana Gusmão, neebe orienta povu liu husi tempu difísil too ba independensia.
“Ami konsidera ita belun diak Timor Leste nian no hein atu habelar ita nia relasaun bilateral sira iha nivel ekonomiku liu husi komersiu no investimentu. Ami konta ho ita nia apoiu kontínua iha ami nia esforsu dezenvolvimentu nian,” Katak PR Horta.
Prezidente Ramos Horta hatoo Timor Leste nia apresiasaun klean ba Kamboja nia apoiu metin ba Timor Leste nia viajen adezaun ba ASEAN.
Kamboja nia advokasia mak instrumental hodi avansa Timor Leste nia integrasaun ba komunidade rejional.
(eme)
