DILI, STLTIMORLESTE.com – Kampu trabalhu hanesan parte importante iha setor ekonomia, tanba kampu trabalhu laos deit servisu ba servisu nain sira, maibe kampu trabalhu mos bele asegura estabilidade ekonomia, estabilidade politika no seguransa iha rai laran.
Emprezariu Nasional, Agostu de Araujo hatete, iha nasaun neebe deit, governu no governante sira halo esforsu oin oin hodi loke kampu de trabalhu ba forsa serbisu nain. Naturalmente kampu de trabalhu barak liu mai industria ka fabrika sira. Tanba ho indústria mak bele absolve forsa trabalhu barak.
Iha nasaun hanesan Timor, industria limitadu no nasaun nee sai nasaun konsumtivu tanba povu ida nee hatene deit konsumu sasan husi importansaun. Nasaun nee susar tebes loke industria tanba povu kiik ka uituan deit no susar atu atrai investidor atu investe.
“Situasaun iha ita nia nasaun laran limitadu tebes mak ita nia sidadaun sira ba buka serbisu iha estranjeiru hodi hadia sira nia moris no hadia vida familia. Tanba nee joven barak nadodon ba buka serbisu iha estranjeiru ho finanasiamentu rasik sein prezensa governu iha kestaun nee,” dehan Agostu ba STL iha Akait, Dili, Segunda (26/01/2026).
Nia dehan, tuir loloos kualker sidadaun neebe hakarak buka serbisu iha estranjeiru tenke fasilita husi governu laos deit iha nivel administrasaun, maibe fasilita mos bele liu husi halo negosiasaun ho nasaun seluk hodi bele simu Timor oan serbisu iha nasaun neeba.
Tanba realidade hatudu joven hakarak serbisu iha estranjeiru ho esforsu mesak atu hetan lalais serbisu iha estranjeiru. Tanba esforsu mesak laiha partisipasaun governu hodi ajuda sira, maka dala barak forsa trabalhu sira hetan difikuldade wainhira too iha nasaun neebe sira too ba.
Iha parte ketak Observador Politika, Delfin da Silva hatete, Governu tenke kria kondisaun atu nunee ema mai buka servisu iha nee, laos Timor oan sai atan hela deit ba ema estranjeiru sira.
“Hau hanoin ita tenke prepara aan didiak, hodi sai patraun hanesan ita nia maluk sira ba servisu ho ema iha estranjeiru, hau la konkorda Timor oan kontinua sai pembantu iha nia rai rasik, tan nee ita tenke prepara, ema mak mai buka servisu iha ita nia rai, no Timor oan mak tenke sai patraun iha rai laran,” dehan Delfin.
(car)
