DILI, STLTIMORLESTE.com – Kandidatu neebe hili husi Prezidente Republika (PR) Jose Ramos Horta mak sei dirije komisaun rekrutamentu ba juiz neebe sei tuur iha Supremu Tribunal Justisa (STJ).
Kestaun nee hatoo husi Prezidente Parlamentu Nasional (PPN), Maria Fernanda Lay ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kuarta lokraik (07/01/2025).
PPN dehan, kandidatu ba komisaun rekrutamentu Juiz neebe tuur iha Supremu Tribunal Justisa husi Prezidente Republika no husi Parlamentu Nasional, maibe ida neebe mak dirije komisaun nee husi ema ida neebe hili husi Prezidente Republika rasik mak lidera.
PPN dehan, Prezidente Republika (PR), Jose Ramos.Horta hili Avelino Coelho da Silva mak sai nuudar Prezidente Komisaun Rekrutamentu ba Juíz.
“Hau hanoin ita foin hahu, ita boot sira lembra katak Dezembru tinan kotuk ami mos hatoo kandidatu para hodi hili, iha nee duni (palasiu Prezidensial) ita boot sira husu hau, hau dehan seidauk hili eleitu, tanba tuir lei parlamentu reprezentante rua Prezidente Republika iha ida, neebe indika husi Prezidente Republika mak sei dirije komisaun nee, neebe hau hanoin oinsa mak sira halo konvokatoria neebe Dra. Carmelita mak indika husi parlamentu, senhor ida husi PD naran hau la hatene, nia advogadu ida, hau espera katak sira iha reuniaun iha inisiu semana sesta feira para hodi haree halo sira nia planu fatin atu servisu apoiu saida deit mak sira presiza para parlamentu bele prosede iha fulan Janeiru nia laran,” katak nia.
Nia hatete, foin hili atu pose ka lae, nee Konselhu Superior Majistratura mak sei haree, no komisaun nee halo deit selesaun rekruta asesor internasional ida para hodi halo selesaun ba Juiz sira ho kriteria neebe prienxe tuir lei.
“Ida nee liu hotu tiha mak foin hatoo ba Konselhu Superior, agora atu ba Supremu Tribunal bainhira ba PJR mos sei halo rekrutamentu iha prosimu, depois ida nee foin mak haree fo tomada de pose, problema Konselhu Superior nia laiha buat ida ho parlamentu,” dehan PPN.
Jornalista: Emerenciana Pinto
