DILI, STLTIMORLESTE.com – Portavos Komisaun Rekrutamentu, Superintendente Antonio da Luz hateten, Komando Polisia Nasional Timor Leste (PNTL) liu husi Sekretariadu Rekrutamentu PNTL fo sai ba publiku katak, Kandidatu PNTL foun neebe liu selesaun dokumentus hamutuk 12.851.
Nia dehan, admitadu iha selesaun dokumentus rezultadu verifikasaun rekezitu Admisaun ba Kandidatu Ajentes PNTL letivu ba tinan 2025 too 2026.
“Ita haree admitidu iha selesaun dokumetus total 12.851, husi numeru nee feto 3.322 no mane 9.529,” informa Portavos Komisaun Rekrutamentu Superintendente, Antonio da Luz ba jornalista sira liu husi konferensia impresa iha Centru Formasaun Polisia (CFP) Komoro, Dili, Kinta (02/10/2025).
Nia argumenta, sekretariadu rekrutamentu simu dokumentu kandidatu sira nian neebe submete husi pontu fokal kada munisipíu 13 inklui RAEOA, nee iha mane 10.255 no feto 3.515, total hamutuk 13.770.
“Ita haree ba la admitidu iha selesaun dokumentus total hamutuk 919, mane 726 no feto 193,” nia esplika.
Nia deklara, orariu prova kultural sei realiza iha loron 12 Outubru 2025, tuku 07:00 – 8:00 kandidatu sira iha fatin ona.
“Tuku 07:00 – 8:00 ita nia kandidatu sira iha fatin ona, depois kandidatu sira iha fatin izame oras 08:00-08:45, nomos instrusaun ba kandidatu sira hodi halo pereprasaun iha oras 08:45-9:45, distribusi materia ezame ba kandidatu sira iha tuku 09:45 – 09:59, antes tuku 10:00 – 12:30 nee hahu ezame too remata,” nia hatutan.
Nia informa, kandidatura sira neebe tuir ezame iha munisipíu idak-idak nian, hanesan iha eskola sira neebe termina ona, Munisipíu Aileu ESTV Aileu Vila ho ESGAM Aileu.
Nia koalia, Munisipíu Ainaro kandidatura sira tuir ezame iha fatin EBC Venancio Fraz no Atauro sei halao iha ESJ 99 Atauro, Munisipíu Baukau iha ESJ Nu. 02 Vila Nova Baukau, Munisipíu Bononaro iha ESJ Dom Martinho da Costa Lopes Maliana, Munisipíu Kovalima nian sei halao iha ESGB-Serankotek-SUAI.
“Ita Munisipíu Dili iha CFP, nomos EBC 30 de Agostu ho 5 Komoro, nomos STV Bekora ho STV 28 Novembru Bekora, Munisipíu Ermera ezame sei halao iha ESJ Nino Koni Santa no Sekundaria 10 de Abril Ermera, Munisipiu Lautem ESJ Nino Koni Santana,” nia hatutan.
Nia koalia, Munisipíu Likisa nian Ensino Basico No. 01 Likisa, Munisipíu Manatuto iha ESJ Kay Rala ho Eskola Publika Beadi, nomos Oe-kosse Rala ho Eskola Publika BEADI, Manisipiu Manufahi iha ESJ 1912 Manufahi, Oekusi EBC + EBF 1 de Maio Balapan, Munisipíu Vikeke Eskola Sekundariu Jeral 4 Setembru no Ensinu Baziku 01 Beloi.
“Material neebe mak ita nia kandidatu sira lori hodi tuir ezame mak Kartaun Elektoral orijinal, BI orijinal, lapis, lapizeira kor azul, apagador, regua sirkulus, aviador, tanba nee husu ba kandidatu sira aban bele ba idak-idak nia munisipiu hodi haree naran no kandidatu sira neebe rejistu iha CFP mai iha CFP no sira neebe rejistu iha Komando jeral PNTL bele ba haree iha neeba,” nia afirma.
Jornalista: Jeniche da Costa
Editor: Xisto Mendonça
