BAUKAU, STLTIMORLESTE.com – Kandidatu profesores nain 600 resin iha Munisipiu Baukau submete ona dokumentu ba Ministeriu Edukasaun (ME), hodi konkore vaga profesores ba Ensinu Sekundaria nian.
Diretor Servisu Edukasaun Munisipiu Baukau, Afonso dos Santos da Costa esplika, durante semana rua husi loron 24 Marsu too 07 Abril 2025, ekipa Nasional husi ME destaka iha Baukau simu dokumentus husi kandidatu sira neebe submete ona ba Ministeriu hafoin selesiona liu husi teste.
“Ekipa Nasional simu iha momentu nee kuaze 600 resin neebe rejistu ona atu ba teste, neebe sira lori ona ba Dili ba profesores sekundaria nian,” hateten Afonso dos Santos da Costa ba jornalista STL iha Vila Nova, Baukau, Kuarta (23/04/2025).
Nia sublina, profesores neebe submete ona dokumentu sei hein prosesu teste husi ekipa Ministeriu no profesores neebe selesionadu sei koloka ba Munisipiu sira inklui Munisipiu Baukau, nunee bele eleva kualidade edukasaun diak liu tan ba estudante sira iha Ensinu Sekundariu Jeral no filial sira.
Tanba daudaun Eskola Ensinu Sekundariu iha Munisipiu Baukau sei enfrenta menus profesores neebe fo impaktu ba prosesu aprendizajen iha nivel eskola, tanba hetan materia tarde implika ba prosesu ezame.
“Eskola sekundaria neebe sei menus profesores nee eskola filiais sira, iha nee eskola sira iha sidade laran sei diak oituan, maibe iha postu sira nee mak barak sei falta,” Afonso akresenta.
Diretor nee argumentu, mezmu Servisu Edukasaun Baukau laiha dadus kona-ba eskola ensinu sekundaria neebe menus profesores, maibe ekipa tekniku husi nasional halo ona levantamentu, nunee bainhira remata teste, Ministeriu Edukasaun iha ona planu atu koloka tuir lista neebe ekipa rekolha antes.
Maibe prosesu aprendizajen ba primeiru trimestral anu letivu 2025 nian kauze lao diak, tanba esforsu masimu husi profesores permanente sira neebe destaka ona iha nivel eskola, mezmu ho kondisaun menus profesores.
Entretantu Eskola Ensinu Sekundaria neebe eziste iha Munisipiu Baukau hamutuk 28, kompostu sekundaria sentral, filial no tekniku vokasional.
(tom)
