BAUKAU, STLTIMORLESTE.com – Kandidatura membru polisia foun hamutuk nain 16 iha Munisipiu Baukau la tuir ezame prova kultural, neebe realiza iha loron 12 Outubru 2025.
Segundu Komadante Komando Polisia Munisipiu Baukau, Fasiu de Jesus Lima relata, Kandidatu membru Polisia foun iha Munisipiu Baukau neebe liu selesaun dokumentus hamutuk nain 778, maibe husi numeru kandidatu refere nain 762 deit mak tuir ezame kultural enkuantu nain 16 la tuir ezame, tanba marka prezensa.
“Nain 16 la marka prezensa iha ezame prova kultural ida nee iha eskola Sekundaria Jeral numeru 02 Vila Nova Baukau, kona-ba sira 16 nee laiha tan planu, tanba data ezame dia 12 Outubru 2025 termina iha oras 12:00,” Fasiu informa iha Vila Nova, Baukau, Segunda (13/10/2025).
Ezame prova kultural ba kandidatu membru Polisia foun husi Munisipiu Baukau nian tuir nia realiza iha edifisiu eskola Sekundaria Jeral 02 Vila Nova ho sala ezame hamutuk 20, kada sala ezame akumula kandidatu membru Polisia sira nain 40, akompanha husi ekipa fiskalizador nain 2, enkuantu delegadu juri husi Nasional no Munisipiu inklui fokal poin fo deit observasaun iha fatin ezame.
Maibe materia ezame ba kandidatura sira prepara husi Ministeriu Edukasaun, tanba servisu hamutuk ho Komando Polisia Nasional Timor-Leste ho pontus 50 husi materia 6 mak hanesan Lian Tetum, Português, Historia, Geografia, Konstituisaun RDTL inklui Matematika.
“Valor husi pontus 50 nee hau la hatene desizaun final nee hira nee Edukasaun mak determina, materia ezame nee eskoila deit A,B, C neebe sira lakon iha ezame prova kultural nee sira lakon ona labele hakat, kona-ba atu fo sai rezultadu iha nivel nasional” Fasiu fundamenta.
Kandidatura membru Polisia, Adélia Brites Pereira sente kontente, tanba liu husi dokumentus kontinua partisipa iha prova kultural.
“Hau rekomenda ba komisaun sira labele hamosu sistema familiarizmu, hau espera katak sei liu iha sesaun ida nee,” Adélia sujere.
Nunee mos kandidatura membru Polisia Juvêncio Domingos de Oliveira Fátima apresia ho preparasaun komisaun rekrutamentu membru Polisia foun, tanba ezame realiza ho situasaun hakmatek iha sala laran, maibe husu labele pratika sistema familiarizmu.
Jornalista: Tomas Reis
Editora: Carme Ximenes
