DILI, STLTIMORLESTE.com – Governu aprova projetu rezolusaun Governu neebe aprezenta husi Ministru Agio Pereira hodi kansela lisensa jogu online, nee desizaun neebe diak, maibe husu Governu loke prosesu ba ema neebe fasilita no fo lisensa ba jogu online nee.
Kestaun nee hatoo husi Visi Diretor HAK, Antonino de Limas ba Jornalista sira, iha nia knaar fatin Farol, Díli, Segunda (06/10/2025 ).
“Desizaun neebe diak Governu tenke halo ida nee duni labele koalia deit hetan tiha kazu mak foin foti medidas nee ita kestiona, saida mak Governu deside tenke hanesan nee duni, fiar katak bao in Governu sei lafo lisensa ba bisnis sira ho tipu online,” dehan Antonino.
Jogu online nee tuir nia afeita ba ema barak no ema barak sofre lakon bainhira envolve jogu nee hanesan moras sosial neebe halo ema la produtivu hanoin atu serbisu hanoin mak joga deit, ida nee sai ona toman bele afeita la halo serbisu ikus hamosu aktu balun liu liu aktu kriminal mos.
“Se joga Online nee toman ona lakohi serbisu osan laiha bele faan buat ruma no faan sasan neebe laos ninia tan ida nee bele akontese kazu,” katak nia.
Kestaun hanesan hatoo mos husi Peskizador Asia Justisa and Rights, Inocencio de Jesus Xavier hatutan, kansela jogu Online nee buat diak ida neebe oras nee Governu halo dadaun bele antisipa, hodi halo prevensaun kontra kriminozu sira husi krime organizado sira.
“Triste oituan kuandu ita nia rai ita nia Governante sira ema balu fasilita atu fo lisensa jogu online nee lao tiha ona depois halo tiha atividade sira neebe kontra Sistema lei sira, ita latoo deit prosesu rejulusaun suspensaun maibe maibe loke prosesu ba ema sira neebe fasilita ema sira neebe lisensa, ema sira neebe sai mata dalan no sai garantor ba jogu sira sira nee tenke loke prosesu investigasaun se iha grave sira tenke ba komarka hodi responsabliza ba sira nia aktu,” katak nia.
Maibe nia dehan, presiza loke prosesu ba ema neebe fasilita no fo lisensa hodi responsabliza ba sira nia aktu, tanba Timor Leste laos fatin ba kriminozu, maibe Timor Leste tenke sai fatin hakmatek pas nunee bele fo komfiansa ba ema estranjeiru sira atu mai investe.
Timor Leste sai fali fatin kriminozu ida nee publiku kestiona, tanba nee husu laos too iha rejulusaun do Governu deit maibe tenke loke prosesu hasoru autor sira neebe mak fasilita jogu online nee.
“Se deit mak komete tantu nia boot ka kiik ka ema timor estranjeiru ita tenke aplika lei, hodi nunee ema hotu hotu submete ba lei, ita koalia kona-ba supermasia da lei tenke tuir nunee bele fo duni efeitu ba ema sira neebe komete krime sira nee, se ita kontinua loke bele iha tentativa ba mony Laundry ka fase osan nia pronugrafia, trafiku humanu esplorasaun bele mosu iha ita nia ema investor lakohi mai halo investimentu,” katak nia.
Nia mos atoo agradese ba Ministru Agio Pereira neebe ho brani bele publika iha nia konta Facebook hatudu katak, ema save ruma neebe iha nunu Governu nee haree buat ruma inklui mos relatoriu UN nia.
Entretantu foin lalais Governu aprova ona projetu rezulusaun Governu nia neebe aprezenta husi Ministru Agio Pereira, hodi kansela lisensa Jogu Online iha teritoriu Timor laran.
Jornalista: Emerenciana Pinto
Editora: Carme Ximenes
