DILI, STLTIMORLESTE.com – Wainhira estudante sira ho karakter neebé la hanesan, professores sira mak tenke uza maneira oin-oin.
Afirma Koordenadora Pre-Eskolar Moris Foun I, Domingas Beatriz da Cunha ba STL, Domingu nee (24/11/2024).
“Iha Pre Escolar nee hasoru labarik sira tama mai seidauk toman no sira tanis, nuudar profesores presiza iha responsabilidade ba ida nee, tenke buka meus para labarik sira bele adapta ho profesor sira, laos profesor deit, maibe sira mos sai nuudar inan, tanba labarik tinan 3 too 5 nee sai inan barak liu Mak profesores, tanba labarik idak-idak mai ho karakter neebe mak la hanesan, no labarik balun mai ho kondisaun neebe defisiensia,” nia afirma.
Domingas dehan, primeiru labarik idak-idak tama mai ho karakter neebe la hanesan, balun tama mai toman kedas profesor, maibe balun la toman no sei lori tempu, maibe nuudar edukador hanesan inan ba sira sempre buka meus oin-oin.
Iha fatin seluk, Koordenador Pre Eskolar Sagrada Familia, Cornelio A. Soares hatete, iha Pre Eskolar nee labarik sira idade tinan 4 too tinan 5, dala ruma sira mai seidauk toman no sira nia inan aman sei akompanha sira.
(jac)
