BAUKAU, STLTIMORLESTE.com – Iha loron 16 Maiu 2025, ema deskonhesidu tuda rahun kareta aluger ida husi Ministeriu Komersiu no Industria (MKI) ba Diresaun Nasional Apoiu Dezenvolvimentu Mikro Pekenas, iha Munisipiu Baukau.
Tekniku Profisional husi Diresaun Nasional Apoiu Dezenvolvimentu Mikro Pekenas, Ilario da Cruz esplika, prezensa ekipa Diresaun Nasional Apoiu Dezenvolvimentu Mikro Pekenas iha Munisipiu Baukau, hahu iha loron 14 Maiu, kobre Postu Administrativu Baguia, no loron 15 Maiu kobre Postu Venilale, no loron 16 Maiu nee planu atu kontinua kobre Postu Vemasi, objetivu halo monitorizasaun ba empreza mikro pekenas sira.
Nunee durante loron tolu deskansa iha fatin Guest House ida iha Baukau, maibe kareta aluger marka Hilux kor mutin ho sapa matrikula B.21-508 hetan tuda husi ema deskonhesidu iha area Munisipiu Baukau, rezulta vidru kotuk hetan estragus.
“Ami toba iha nee (Guest House) kalan tolu ona, maibe ema tuda rahun kareta vidru kotuk mak kuak, hodi kalan jam 12 hau sei tur, maibe jam 01 hau dukur tama ba toba neebe hau la hatene ema tuda, dader ami hader mak haree deit. Kareta nee ministeriu aluga kompanhia nian,” haktuir Ilario ba jornalista sira iha fatin akontesementu Baukau, Sesta (16/05/2025).
Nia sublina, kareta aluger refere ho valor US$ 120.00 kada loron ba funsionariu nain tolu utiliza halao servisu monitorizasaun ba empreza mikro pekenas sira, maibe iha loron 16 Maiu madrugada hetan estragus husi ema deskonhesidu liu husi tuda.
Nia konsidera, mezmu tuda kareta involve husi ema deskonhesidu, maibe keixa ona ba Polisia Eskuadra Postu Baukau Vila, tanba asaun refere fo impaktu ba servisu estadu.
“Lo-loos dadersan ami ba ona servisu, mais ami tenke ho Autoridade kompetente Polisia investiga ida nee iha nee, tanba ema nia kareta estragus entaun ami tenke rezolve ida nee,” Ilario akresenta.
Nain ba fatin deskansa Guest House ida iha Baukau neebe oferese fatin deskansa ba funsionariu husi Diresaun Nasional Apoiu Dezenvolvimentu Mikro Pekenas, inisial JCAMES katak, kalan dahuluk no daruak, ekipa Ministeriu para kareta iha fatin parajen Guest House nian, maibe ba kalan datoluk, ekipa sira para kareta iha estrada publiku, nunee iha dader hader haree kareta refere parte vidru kotuk hetan ona estragus.
“Sira toba iha nee hahu Tersa kalan, Tersa kalan no Kuarta kalan kareta tama mai uma oin, hodi kalan sira la hatama kareta, para deit iha estrada, maibe fo hatene sira atu hatama tiha kareta, maibe sira la hatama, dader hader mai haree kareta ema tuda,” haktuir nain Guest House nee.
Tuir observasaun STL nian iha terenu nota katak, parte Polisia Eskuadra Postu Baukau Vila too kedas fatin rekolha evidensia hodi kontinua prosesu.
(tom)
