BAUKAU, STLTIMORLESTE.com – Kareta carry ho sapa matrikula B.13-354 hetan asidente halai sai husi estrada hodi monu ba rai naruk iha kruzamentu Tirilolo, Postu Administrativu Baukau Vila, rezulta ema nain 2 kanek.
Xefe Suku Tirilolo, Elvino Freitas Belo informa, asidente refere akontese iha loron 07 Agostu nee pur-volta tuku 06:30 parte dader iha neebe kareta refere diresaun husi Postu Administrativu Laga tula ho ikan no sasan balun too iha area estrada kruzamentu area Sentru Saude Tirilolo monu ba rai naruk hodi rezulta kundortor no pasajeiru ida kanek.
“Kareta nee diresaun husi Laga mai Baukau tula ikan no sasan iha sakola, rezulta kundortor ho pasajeiru ida evakua ona ba Hospital HoREX Baukau,” informa.
Nia sublina, hafoin asidente nee akontese, parte Polisia Eskuadra Postu Baukau Vila too kedas fatin akontesementu hodi evakua vitima nain 2 ba Hospital Rejional Eduardo Ximenes (HoREX) hodi hetan tratamentu husi mediku sira.
Enfermeiru sala emerjensia Hospital Rejional Baukau Ximenes Baukau, Mario da Costa Belo Guterres informa, sidadaun nain 2 neebe hetan asidente iha Tirilolo mak hanesan, Painino Viegas Amaral idade 34 nuudar pasajeiru hetan kanek kaman iha parte liman sikun no aintur, enkuantu kundotor Francisco da Silva dos Reis Amaral idade 23 hetan kanek iha matan fukun no inus inklui hetan pankada mos iha parte hirus matan neebe dadaun halao hela tratamentu iha sala emerjensia HoREX.
“Pasiente nain 2 hetan asidente iha Hospital Antigu nian evakua mai hospital ita nia doutor sira guarda kalan nian atende tiha kedas, agora pasiente observa hela iha emerjensia, kondisaun jeral diak,” Mario informa.
Enfermeiru nee sublina, mezmu pasiente nain 2 kondisaun jeral diak, maibe pasiente Francisco da Silva dos Reis Amaral tenke submete ba prosesu X-Ray hodi hatene klean nia saude, tanba iha parte hirus matan hetan pankada makaas.
Entretantu vitima nain 2 nuudar vida negosiu ikan husi Munisipiu Vikeke no sosa ikan iha Postu Administrativu Laga hetan asidente iha kruzamentu estrada publiku besik Sentru Saude Tirilolo.
tom
