AMBENO, STLTIMORLESTE.com – Kareta FALINTIL – Forsa Defeza Timor Leste (F-FDTL) ida bakufila iha Area Uthaufoo Panamtasa Suku Suniufe, Postu Administrativu Nitibe, Rejiaun Administrativa Espesial Oekusi-Ambeno (RAEOA), iha tuku 10:45 OTL, hamutuk nain 8, iha asidente masal nee pasiente sira ho kondisaun kanek kmaan.
Tuir Doutor Responsavel Pikete iha Hospital Referal Oekusi, Doutor Hendrique Coa ba STL iha Salaun Emerjensia Hospital Referal Oekusi, Kinta nee (21/08/2025) katak, sira simu informasaun asidente kareta F-FDTL ida bakufila iha Area Uthaufoo Panamtasa iha tuku 10:45 no kareta estadu ida ho kareta Ambulance rua husi Hospital Referal Oekusi mak mobiliza vitima sira husi fatin akontesimentu too iha Hospital Referal Oekusi iha tuku 11:55 OTL.
“Ami husi Salaun Emerjensia Hospital Referal Oekusi simu informasaun asidente masal F-FDTL iha tuku 10:45 no pasiente sira nee mai too iha salaun Emerjensia iha tuku 11:55 no ami konsege fo tratamentu saude ba sira ho diak, nunee rezultadu tratamentu saude no observasaun mediku neebe iha, hatudu katak sira nain 3 kanek no nain 5 hetan pankada no isin bubu kmaan,” dehan Doutor Hendrique Coa.
Nia haktuir tan katak, durante fulan ida nee kazu dezastre trafiku barak mak tama iha salaun Emerjensia Hospital Referal Oekusi, iha fulan Agostu ida nee rezulta ema nain rua mate tanba asidente trafiku, ida mate fatin no ida seluk hakotu iis iha salaun Emerjensia tanba kanek grave.
Vitima Asidente masal nee mak, Antonio do Santos, Odelio A. Soares, Antonio da Silva Soares, Donalto F.L. Soares, Silvino L.Xavier, Crisantos do Santos no Agosto Corbafo.
Too notisia nee hatun seidauk hetan konfirmasaun husi parte Polisia kona-ba motivu nee, maibe informasaun neebe STL asesu katak, dadersan Komponente Naval F-FDTL ho ninia membru sira halo patrolhamentu iha area kosteira tasi ibun hahu husi Sidade Oekusi atu ba Citrana Suku Beneufe, maibe ba too Area Uthaufoo Panamtasa, Suku Suniufe, Postu Administrativu Nitibe RAEOA, sira fila fali mai mak derepente kareta bakufila dala tolu monu tun too tasi ibun, rezulta sira nain 3 kanek kman no nain 5 hetan pankada iha isin ho isin bubu kmaan, konsege hetan tratamentu saude ho diak iha Hospital Referal Oekusi.
(jos)
