BAUKAU, STLTIMORLESTE.com – Deskonfia kareta multi funsaun ambulansia neebe destaka iha Sentru Saude Baguia falha, la konsege tula inan gravida ba fasilidade saude, nunee prejudika bebe ida mate iha inan nia kabun laran.
Administrador Postu Administrativu Baguia, Mario Xavier da Silva esplika, iha loron 16 Marsu 2025, akontese inan isin gravida iha Suku Samalari, Baguia, atu partus, nunee prezisa ambulansia husi Sentru Saude Baguia hodi too Samalari tula inan gravida refere ba fasilidade saude iha Baguia, maibe kondisaun kareta ambulansia neebe destaka iha Sentru Saude Baguia kondisaun aat no mekaniku sira halo hela manutensaun, nunee la konsege tula inan gravida refere hodi difikulta ba kondisaun bebe.
“Sim, informasaun neebe ami asesu husi familia sira difikulta ba ita nia bebe nee rasik, mate iha nia inan nia kabun laran,” hateten Mario ba STL iha Vila Nova, Baukau, Tersa (17/03/2025).
Deskonfia hafoin parte ambulansia la konsege too kauza bebe mate iha kabun laran, nunee parte familia konsege fo partu tiha iha uma hafoin lori inan ba Sentru Saude Baguia ho transporte publiku no kontinua transfere ba Hospital Rejional Eduardo Ximenes (HoREX) Baukau hodi halo tratamentu.
Nia fundamenta, relasiona ho menus fasilidade iha Sentru Saude Baguia, liu-liu transporte multi funsaun ambulansia parte Autoridade Postu Baguia preokupa, tanba bainhira iha tempu emerjensia hanesan nee kareta avaria fo impaktu ba pasiente sira nia kondisaun saude.
“Tuir informasaun sira neebe iha, ami fo ona informasaun ba Sekretaria ASEO no PID liu husi mensajen atu komunika ho saude oinsa mak bele haree kona-ba kareta multi funsaun sira nee,” Mario argumenta.
Autoridade Postu Baguia nee informa, hafoin akontese, parte Autoridade Postu relata kedas informasaun verbal liu husi via mensajen ba Sekretaria Munisipal Asuntu Sosial no Organizasaun inklui Sekretariu Munisipal Planeamentu Investimentu no Dezenvolvimentu hodi kontinua relata ba parte relevante hanesan Ministeriu Saude hodi fo atensaun ba kestaun refere.
Maibe Autoridade Postu nee mos husu ministeriu relevante atu haree kestaun ekipamentus sira ba medikamentus nian nomos transporte, nunee la prejudika ba komunidade sira ba asuntu tratamentu saude nian.
Liga asuntu nee, STL tenta konfirma ho Diretor Servisu Saude Munisipiu Baukau, maibe la fo komentariu, tanba dehan kareta multi funsaun ambulansia sufisiente hela iha nivel fasilidade saude sira.
(tom)
