BAUKAU, STLTIMORLESTE.com – Kareta multi funsaun neebe Governu liu husi Ministeriu Saude (MS) destaka iha Sentru Saude Kelikai, Munisipiu Baukau, avaria ona loron 4 ona, maibe seidauk halo manutensaun.
Xefe Sentru Saude Kelikai, Domingos Boavida informa, kareta refere hahu avaria iha semana kotuk, nunee ohin loron seidauk halo movimentu hodi fasilita servisu hanesan transporta pasiente husi Sentru Saude Kelikai ba Hospital Rejional Eduardo Ximenes Baukau (HOREX) no transporta pasiente husi uma ba Sentru Saude Kelikai inklui apoiu servisu seluk tan.
“Agora kareta nee para lai, tanba informasaun husi motorista katak roda labele halai dehan metin hela deit neebe para loron 4 ona,” hateten Domingos Boavida ba STL iha Kelikai, Kuarta (01/10/2025).
Nia katak, kareta multi funsaun refere destaka iha tinan 2015 no durante nee nia kobrementu transporta pasiensia husi suku 15, kompostu suku sira husi Postu Kelikai, Matebian no Kelikai Antigu ho kondisaun estrada neebe grave ba Sentru Saude Kelikai no HOREX, nunee daudaun kareta refere avaria.
Maibe liu husi pedidu Sentru Saude Kelikai relata ona ba Servisu Munisipal Saude Baukau, atu halo manutensaun ba kareta refere. Nunee bele ajuda no apoiu Servisu Saude nian iha Sentru Saude Kelikai, liu liu tula pasiente emerjensia sira husi suku 15 ba HOREX Baukau.
“Agora meuis neebe ami halo mak Kareta ida nee kondisaun aat bele husu apoiu ba sira Munisipiu lae ami bolu Sentru Saude seluk nia apoiu, se emerjensia liu ona ami koordena ho familia pasiente aluga Kareta publiku depois pesoal saude akompanha,” katak Domingos Boavida.
Nia komenta, hafoin kareta multi funsaun refere avaria meius neebe Sentru Saude Kelikai halo transporta pasiente husi Sentru Saude Kelikai ba HOREX Baukau mak liu husi husu apoiu ba kareta multi funsaun husi Sentru Saude seluk no husu apoiu ba Servisu Munisipal Saude Baukau, maibe bainhira pesoal saude sira haree kazu emerjensia no kareta multi funsaun husi Sentru Saude seluk no husi Servisu Munisipal Saude Baukau okupadu, mak fo hanoin ba parte familia pasiente aluga transporte publiku hodi transporta pasiente no hetan akompanha husi pesoal saude sira.
Maibe hafoin kareta multi funsaun refere avaria too ohin loron Sentru Saude Kelikai seidauk foti inisiativa hodi orienta familia pasiente aluga transporte publiku hodi transporta pasiente, tanba hetan apoiu makaas husi Sentru Saude seluk.
“Meius mak pedidu ami hatoo tiha ona, mais pelu menus hadia lalais para bele halao atividade loro-loron nian,” nia sujere.
Tuir observasaun STL nian iha terenu nota katak, daudaun kareta multi funsaun ho sapa matrikula 06.677 G para hela iha edifisiu Sentru Saude Kelikai ho kondisaun roda 4 kompletu.
Jornalista: Tomas Reis
Editora: Domingas Gomes
