BAUKAU, STLTIMORLESTE.com – Kondutor transporte publiku sira iha kapital Baukau preokupa kondisaun merkadu foun Tuanau, tanba tempu loron bazar transporte publiku sira liu-liu mikrolet no carry sempre hamosu engarrafamentu ka sena malu iha merkadu foun refere, tanba laiha fatin terminal.
Kondutor transporte publiku diresaun Vila Nova-Vila Antiga, Mario Guterres Soares informa, durante instala merkadu foun Tuanau espasu ba transporte publiku no privadu la sufisiente, tanba estrada kobre merkadu laran ho medida kloot, nunee tempu bazar iha loron Domingu no Kinta hamosu engarrafamentu iha merkadu refere, tanba laiha terminal ba transporte sira hodi para.
Nunee obrigatoriu transporte publiku sira hanesan mikrolet no carry sira halai tama too merkadu laran hodi hamosu engarrafamentu.
“Ami la satisfas, tanba iha nee terminal laiha tama iha nee forma too oras ida resin mak ami foin sai husi nee, tama mai mos araska sai mos araska, maibe laiha ema atu manda kareta sira sai husi nee,” hateten Mario ba STL iha merkadu Tuanau, Kinta (03/07/2025).
Tuir Kondutor nee katak, laiha fatin terminal ba transporte publiku sira iha merkadu foun refere, obrigatoriu kondutor sira konduz kareta tama too area merkadu nian hafoin tula pasajeiru, maibe hamosu engarrafamentu, tanba laiha ekipa jestaun merkadu atu diriji movimentu ema ho transporte iha merkadu refere.
Nia salienta, durante tempu bazar iha loron Domingu no Kinta hamate rendimentu kondutor sira husi transporte publiku, tanba kastigu aan ho kareta iha engarrafamentu ho oras naruk lakon iha rendimentu.
“Ami kondutor sira husu ba na’i ulun sira se bele haree terminal ida ba ami kondutor sira hodi ami bele buka pasajeiru nee ho diak,” Mario rekomenda.
Kondutor transporte publiku, Afonso Luís da Silva Magno akresenta, funsionamentu merkadu foun Tuanau durante fulan haat ona, maibe laiha terminal ba transporte publiku sira, tanba nee kada loron tula pasajeiru ba merkadu foun refere hasomu engarrafamentu.
“Ami tama merkadu laran mak engarrafamentu hanesan nee, ami atu halai sai mos araska, dala ruma too oras rua tolu ami fila hetan deit US$ 10 ou lae US$ 20 deit, neebe hau husu ba ukun nain sira halo netik terminal hodi ami para iha laran pasajeiru sira mai sae,” katak Afonso.
Tuir kondutor nee katak, hamosu engarrafamentu iha merkadu Tuanau, tanba kauza husi estrada iha area merkadu nian medida kloot, laiha espasu ba ema ho transporte halo movimentasaun livre, tanba nee husu ekipa jestaun merkadu atu seriu haree asuntu refere.
Liga asuntu nee STL tenta konfirma Diretor Servisu Jestaun Merkadu Munisipiu Baukau, maibe lakohi fo komentariu.
Entretantu observasaun STL nian iha terenu nota katak, iha loron 03 Julhu nee movimentu ema ho transporte publiku hamosu engarrafamentu husi portaun tama ba merkadu too iha portaun sai husi merkadu.
(tom)
