DILI, STLTIMORLESTE.com – Eis kargu xefia husi eskola hein too fulan Janeiru 2025 mak la halo pagamentu subsidiu, sira sei ezije no hasoru fali rekursu umanu Ministeriu Edukasaun (ME) nian.
Preokupasaun nee hatoo husi Eis Diretor Ensinu Baziku Sentral (EBC – sigla português) Fatumeta, Feliciano Gusmão ba STL iha nia knaar fatin Fatumeta, Tersa nee (03/12/2024).
“Subsidiu nee too agora seidauk tama ida, maibe dala ruma Janeiru 2025 karik, tanba OJE foin mk aprova neebe implementa iha Janeiru karik. Ami hein too Janeiru mak seidauk sai, ami ba hasoru fali rekursu umanu ME nian, para bele prosesa ami nian subsidiu neebe too agora seidauk halo pagamentu,” nia afirma.
Nia sublina, sira ezije nafatin atu nunee ME bele halo pagamentu ba sira no kargu xefia nian. Sira sente triste tanba ME atraza ba pagamentu kargu nian, tanba nee sira hein too fulan oin 2025.
(jac)
