DILI, STLTIMORLESTE.com – Ministeriu Edukasaun (ME) kontinua halo sensibilizasaun ba iha Munisipiu Lautem no Atauro, ho nunee kargu xefia husi eskola tenke iha konhesimentu ba implementasaun programa merenda eskolar.
Lia hirak nee hatoo husi Diretor Nasional Edukasaun Inkluzivu Asaun Sosial Eskolar (DNEIASE), Fernando Soares ba STL iha nia knaar fatin ME, Tersa nee (22/10/2024).
“Kargu xefia sira husi ensinu baziku sira foun, koordenador no inspetor foun sira. ME iha politika ba implementasaun programa merenda eskolar nee rasik, ita presiza sensibiliza tan manual ba implementasaun merenda eskolar, atu nunee sira bele iha konhesimentu neebe diak no implementa programa nee tuir manual neebe iha, tuir menu no kalendariu efetivu neebe iha. Ita haree dala barak EJP sira implementa iha komunikasaun neebe ladun diak, entaun ita tenke halo sensibilizasaun, atu nunee ba futuru tenke iha komunikasaun neebe diak liu tan ba asuntu refere,” nia informa.
Nia hatutan, atu oinsa mak kargu xefia sira bele halo monitorizasaun ba implementasaun programa merenda eskolar iha eskola, no EJP sira implementa tuir orientasaun manual neebe iha, diretor sira tenke hatene implementasaun nee tuir duni manual ka lae, tanba sira mos presiza iha responsabilidade ba asuntu ida nee.
(jac)
