DILI, STLTIMORLESTE.com – Komisaun B neebe trata Asuntu Negosiu Estranjeiru no Seguransa Defeza iha Parlamentu Nasional (PN) husu Polisia Nasional Servisu Investigasaun Kriminal (PNSIK), atu halo investigasaun klean ba ema deskonhesidu balu tiru karreta husi Kompanhia Toyota, neebe para iha areadores Kompanhia Lisun foin lalais nee.
Tuir membru Komisaun B, Deputadu Natalino Dos Santos katak, insidente nee hanesan krimi organizadu ida, tanba nee nia husu PNSIK ho PSIK atu halo investigasaun neebe klean hodi buka tuir autor prinsipal sira.
“Ita konsidera nee krimi no bele dehan krimi organizadu, entaun husu ba PNTL liu-liu PNSIK no PSIK atu halo investigasaun hodi bele hatene karreta nee hetan tiru husi se,” hatete Deputadu Natalino ba jornalista sira iha resintu Parlamentu Nasional, Kuarta (22/01/2025).
Nia hatutan, tuir lei Timor Leste iha deit instituisaun rua hanesan PNTL no FALINTIL – Forsa Defeza Timor Leste (F-FDTL) mak bele kaer kilat seluk nee labele.
Tanba nee husu PNSIK ho PSIK atu halo investigasaun neebe lais hodi buk tuir autor prinsipal sira neebe mak tiru karreta, nunee labele halo tauk populasaun sira.
“Tenke Buka tuir autor nee hodi bele submete ba Ministeriu Publiku, nunee bele responsabiliza ba ninia aktu,” dehan Deputadu nee.
Nia afirma katak, iha prosesu deteta membru husi Instituisaun rua PNTL no F-FDTL tenke prosesa tuir lei.
(alb)
