BAUKAU, STLTIMORLESTE.com – Karreta husi membru FALINTIL Forsa Defeza Timor Leste (F-FDTL) nian ida rahun no membru husi Komando Polisia Nasional Timor Leste (PNTL) Munisipiu Baukau nian kanek, iha Suku Triloka, Postu Administrativu Baukau Vila.
Komandante Komando Polisia Munisipiu Baukau, Superintendente Xefe Antonio Maria De Sa esplika, kazu refere akontese bainhira membru F-FDTL identidade Laurentino “Ular” neebe viajen husi Dili ho transporte privadu sapa matrikula A.24-841 TL hamutuk ho familia hanesan oan nain 3 atu ba nia rezidensia hodi selebra loron finadu, maibe too iha area Aubaka Triloka, purvolta tuku 11:00 parte kalan hetan tuda husi suspeitu sira.
“Karreta rahun iha parte vidru oin, kotuk no janela liman loos nian. Nomos problema hodi kalan nee mos ita nia membru OPS ida hetan tuda iha nia ulun kanek, no ida fali tuda iha parte hirus matan,” hateten komandante Komando Munisipiu Baukau ba jornalista sira, iha Vila Nova, Sesta (01/11/2024).
Membru Polisia nain 2 nee tuir nia nain ida ativu hanesan Ofisial Polisiamentu Suku Triloka nian no nain ida seluk nuudar membru Seguransa Nasional Intelejenzia, neebe halo atuasaun ba kazu refere, maibe hetan tuda husi suspeitu sira.
Hafoin kazu nee akontese parte seguransa husi Komando Polisia Munisipiu too kedas fatin akontesimentu, hodi neutraliza no rekolha evidensia sira hanesan karreta inklui kaptura suspeitu prinsipal ba kazu refere.
“Suspeitu nain 2 hodikalan ita kaer ho situasaun fragante de lito no nain 3 seluk ohin dader mak ita kaer mai tan,” Antonio akresenta.
Nia deklara, ba kazu refere Komando Polisia kaptura ona suspeitu nain 5 inklui ho autor prisipal inisial M daudaun detein ona iha sela Komando, maibe parte investigasaun kontinua dezenvolve kazu refere hodi hatene motivu, tanba liu husi investigasaun komando seidauk hatene motivu ba kazu refere.
Maibe Komando sei esforsu hodi aprofunda hodi hatene ba kazu refere aprezenta ba Ministeiru Publiku, tanba involve ba kazu refere ho arma branka neebe dadaun evidensia sira asegura ona iha Komando.
(EST 2)
