DILI, STLTIMORLESTE.com – Katekista nee nuudar vokasaun ida neebe Nai bolu dedika aan tomak ba igreja, hodi servi sarani sira liu husi misaun katekeze.
Katekista Armando Bonefacio Pereira dehan, katekista nee vokasaun ida, tan nee tuir formasaun ba iha katekista nian hakarak duni hili dalan ida nee, se ita hili mai partisipa deit, haree ba nesesidade loron-loron nian too dalan klaran bele sai, maibe Nai mak bolu prontu atu servi.
“Maromak bolu hau hakarak sai katekista atu haklaken Maromak nia liafuan ba ema hotu, maske hasoru dezafiu oin-oin, bele osan iha ou laiha, nafatin servi iha sitausaun saida deit,” hatete Katekista Armando ba jornalista STL iha Komoro, Sabdu nee (29/03/2025).
Nia dehan, fou-foun tama sai fatin-fatin hanorin doutrina ba sarani sira iha Igreja, Kampu Merdeka, Beto, Beto Tasi, Tasi Tolu, oinsa prepara sarani sira atu simu Sakramentu Batizmu, Primeira Komunaun, Krizma no Sakramentu Kaben, nunee mos ajuda padre no madre sira iha igraja.
Nia dehan, sai katekista laos hanesan bai-bain, maske simples maibe knaar nee boot tebes, prontu atu servi, dedika aan halo sakrifisiu no pasiensia hanesan Jesus nia eskolante hodi haklaken Maromak nia liafuan ba ema hotu.
Tanba nee, grasa neebe Nai haraik mai ita atu halao knaar nee, se hau hili oras nee sai kleur ona, maibe vokasaun ida.
Maske hasoru dezafiu, difikuldade oin-oin, maibe mantein nafatin fo tempu tomak, laos buka osan, riku soin mundu nian nee lae, maibe buka riku soin Maromak nian, tanba nee situasaun saida deit mak hasoru entrega ba Nai no kontinua servi too mate.
(joa)
