DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba kazu abuzu konfiansa neebe komete husi arguidu ho inisial M.
Antes nee Tribunal rona ona deklarasaun husi arguidu, tanba nee iha julgamentu kontinuasaun neebe halao iha Kuarta nee (12/02/2025), Tribunal kontinua rona deklarasaun husi sasin Justino da Costa.
Iha sala julgamentu laran sasin deklara, sasin nia profisaun hanesan badaen, no sasin konhese arguidu tanba dala ruma arguidu kontaktu ba sasin ba iha arguidu sira nia uma hodi hadia odamatan.
Sasin rekonhese iha tinan 2017 arguidu kontaktu ba sasin hodi lori odamatan sia (9) ba iha Manleu, hodi hadia no troka odamatan sira neebe antes nee iha ona, maibe uma nain lakohi, tanba nee sasin tau hela odamatan sia nee iha neeba no fila tiha.
Sasin deklara tan, sasin ba hamutuk dala tolu, no ba dala rua uma nain fo hatene ba sasin katak, sira sei ba hela tiha iha kos mak ba hadia. No ikus mai sasin ba lori no pinta atu monta odamatan sia, no pinta maibe uma nain lakohi, tanba nee sasin kontinua fila no odamatan hirak nee rai hela iha neeba too agora.
Sasin deklara, razaun sasin lori odamatan sia nee ba atu troka fali odamatan sira neebe antes nee arguidu monta uluk ona.
Rona tiha deklarasaun sasin, Tribunal adia ba loron 6 fulan Marsu, hodi kontinua rona sasin.
Audensia julgamentu nee prezide husi Juiz Koletivu, Jose Maria, Ersilia de Jesus, Ana Paula, Ministeriu Publiku reprezenta husi Prokurador Aderito Tilman, arguidu hetan astensia legal husi Advogadu Privadu Januario.
(ter)
