DILI, STLTIMORLESTE.com – Relasiona ho kazu asaltu malu iha Munisipiu Ainaru iha loron 2 fulan Novembru, daudaun nee iha hela prosesu investigasaun molok submete ba Ministeriu Publiku.
Lia hirak nee hatoo Komandante Jeral Polísia Nasional Timor Leste Komisariu Jeral, Henrique da Costa ba jornalista sira iha Kaikoli, Dili, Tersa (05/11/2024).
Nia dehan, kazu asaltu malu iha Ainaru, los duni iha dia 2 nee akontesimentu iha fatin tolu, kazu rua iha Maubisi Maulo ho Maulau, ida tan fali iha Hatu Udo nian.
“Ita nia parte Komando Munisipiu Ainaru atende tiha ona, depois horiseik ita mos orienta ita nia Komando Unidade Espesial Polisia halo mos movimentu ba iha neeba,” dehan nia.
Nia haktuir, medida Polisia nian kaptura ona autor sira hodi halo prosesu, hodi aprezenta ba iha Ministeriu Publiku .
Nia akresenta, kronolojia akontesimentu nee tanba ema sira nee mai ho problema pasadu nian, hadau malu rai depois sira mos iha problema partikular hanesan fetosan umane nian, tanba buat sira nee akontese iha tempu naruk liu ba, depois sira uza momentu ida loron finadu nian hodi ataka malu.
Nia dehan, kona-ba autor nain hira mak envolve kazu hirak nee seidauk iha númeiru serteja, tanba sei bolu tan sira seluk hodi halo investigasaun molok submete ba Ministeriu Publiku.
(mar)
