DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu ba kazu asaltu membru Polisia VC, neebe komete husi arguidu nain tolu, GdJdS, SSD no JD.
Antes nee Tribunal rona ona arguidu balu, tanba nee iha julgamentu kontinuasaun nee, Tribunal deside hodi rona fali arguidu nain ida.
Iha julgamentu kontinuasaun nee, Tribunal rona deklarasaun husi arguidu GdJdS deklara katak, sira hela duni iha Aimutin, maibe arguidu nia ferik oan operasi tiha, tanba nee sira muda ba hela tiha iha Surikmas.
Arguidu rekonhese, konhese arguidu nain rua seluk, maibe kona-ba lezadu arguidu la konhese.
Arguidu mos deklara, iha momentu akontese problema arguidu la hatene no arguidu laiha fatin, liu tiha loron ida mak Polisia ba buka arguidu iha nia servisu fatin, no arguidu nia patraun telefone ba arguidu katak, Polisia buka arguidu.
Deklara tan, depois Polisia kontinua ba buka arguidu iha sira nia uma, maibe arguidu tauk hodi halai ses tiha. No arguidu nega laos nia mak lori tudik sona lezadu nia kakorok.
Rona tiha arguidu, Tribunal adia ba loron seluk, hodi rona lezadu.
Tuir akuzasaun katak, iha loron 28 Setembru 2015, haleu oras tuku 20h00, lezadu VC nudar membru PNTL COE (Companha de Operações Especiais, konduz nia motorizada marka yamaha vixion, matrikula F. 1535 TL, husi uma atu ba servisu fatin iha Bairo Pite, Dili, wainhira too loja Marobo II nia oin, iha Aimutin, Dili, lezadu haree arguidu nain tolu, GdJdS, SSD no JD ho grupu taka dalan no lezadu iha deit estrada klaran.
Arguidu JD kaer katana ida iha liman lori taa kedas lezadu, maibe lezadu ses aan husi katana nee kona iha motorizada nia tanki leten parte los, nunee lezadu mos monu tun ba rai.
Wainhira lezadu hamriik, arguidu JD kaer lezadu nia liman sorin karuk no haruka arguidu GdJdS lori tudik sona lezadu nia kakorok, maibe lezadu hakruk hodi tudik nee kona iha lezadu nia rentos, halo lezadu monu tan dala ida ba rai mak arguidu SSD lori fatuk boot ida hodi tuda kona iha lezadu nia ulun sorin los.
Entaun, lezadu koalia ba arguidu nain tolu dehan, “hau polisia”, maibe arguidu sira hatan katak, “o polisia nee, ami labele baku o ka”, tuir mai arguidu nain tolu halo tan agresaun hasoru lezadu.
Tuir mai, Inspetor Polisia, VDC haree ida nee, hasai arma pistola hodi tiru ba leten, nunee arguidu nain tolu ho nia maluk sira hakfodak hodi halai husi fatin akontesimentu.
Lezadu aproveita hodi konsege halai husi fatin akontesimentu nee, no halai too iha Klinika Cito nian mak hetan ajuda husi membru PNTL CSP nain ida hodi transporta lezadu ba Hospital HNGV hodi halo tratamentu.
Audensia julgamentu nee prezide husi Juiz Koletivu, Ana Paula, Ersilia de Jesus, Jose Maria, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensor Publiku Manuel Exposto.
Jornalista: Terezinha De Deus
Editor: Xisto Mendonça
