DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial AF, tanba konduz motor sem karta kondusaun no sikat tudik iha kanotak.
Iha sala julgamentu laran loron Kuarta (19/02/2025) Juiz Arjentino Nunes lee sai akuzasaun katak, iha loron 31 fulan Dezembru tinan 2018, iha tuku 21:55 OTL, testemunha Agente JJ halao hela nia knaar hodi kontrola movimentasaun sarani sira neebe mai partisipa serimonia misa tinan foun iha Igreja Balide Dili.
Husi parte sorin Seminariu Menor Balide testemunha haree ema barak hamutuk iha neeba, nunee testemunha Agente JJ hakbesik hodi identifika saida mak akontese, la kleur arguidu AF mai ho motorizada husi diresaun Eskola Portugues, ho velosidade makaas hodi soke sr MA, arguidu monu ho motorizada hamriik mak losu tudik husi nia kanotak la hatene hodi atu halo aksaun saida.
Haree ida nee testemunha hanesan ajente PNTL, detein kedas arguidu hodi pasa revista, rekolha evidensia tudik oan husi nia liman.
Arguidu mos konduz motorizada sem iha karta kondusaun.
Arguidu halo hahalok nee ho konsiente livre, deliberada, hatene katak, lori sasan kroat (samurai no rama ambon) hanesan meius nebe aktu hodi viola lei.
Arguidu hatene katak nia hahalok sira deskreve iha faktu ida nee nuudar hahalok krimi neebe lei bandu, maibe kontinua halo.
Nunee konstitui arguidu AF hanesan autoria material ho forma konsumada ba krimi detensaun ba armas branka ou lori sasan kroat tuir artigu 19 numeru 1 no lei numeru 5/2017, 19 Abril no kondus motorizada sen karta kondusaun iha artigu 207 Kodiku Penal.
Hatan ba akuzasaun neebe iha, arguidu deklara katak, momentu neeba arguidu ho kondisaun lanu, no arguidu rekonhese konduz duni motor ida maibe la iha karta kondusaun.
Arguidu rekonhese sikat tudik ida iha kanotak, razaun atu defende aan kuandu hasoru problema ruma, no momentu neeba arguidu konduz motor haree polisia ida hamriik hela, halo arguidu tauk hasai tudik neebe iha kanotak hodi sae tiha ba karreta okos, ho ida nee mak polisia nee haree hodi detein kedan arguidu.
Arguidu deklara, lori tudik laos intensaun atu buka ema ba sona, maibe lori deit atu defende aan. Arguidu mos rekonhese laos foin primera vez ba iha Tribunal, maibe antes nee mos tama ona iha prizaun tinan 1 fulan 2 ba kazu neebe akontese iha UNDIL nia oin.
Tribunal rona fali João de Jesus hanesan Ajente PNTL deklara katak, momentu neeba nia hetan orientasaun atu fo seguransa ba sarani sira neebe akompanha misa, depois misa sai sasin nee haree ema hamriik barak iha fatin ida, sasin nee hakbesik ba hodi husu tuir ema hamriik haree saida, maibe la iha ema ida koalia hodi fo hatene ba sasin.
Tanba nee, sasin kontinua lao fali mai oin, derepente arguidu konduz motor ida mai, losu tudik iha kanotak hodi soe ba iha karreta okos, sasin haree no detein kedan arguidu.
Rona tiha arguidu no sasin, iha alegasaun Prokurador Domingos Barreto mantein ho akuzasaun neebe iha, husu Tribunal atu kondena arguidu ba krimi Arma Branka ho Pena Suspensaun no ba krime sem karta kondusaun ho pena multa.
Enkuantu husi parte defeza husu Tribunal tetu sirkunstansia sira hotu, hodi aplika pena neebe justu ba arguidu.
Rona tiha deklarasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu Arjentino Nunes, Zulmira Auxiladora, Ivan Suritai, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensor Publiku, Sergio Dias Quintas.
(ter)
