DILI, STLTIMORLESTE.com – Jurista Sergio Dias Quintas hatete, kazu neebe pendente iha Ministeriu Publika (MP), tanba numeru rekursu umanu seidauk sufisiente.
“Fator ida mak tanba rekursu umanu seidauk sufisiente, segundu halo jestaun ba rekursu umanu neebe iha, se ita iha numeru rekursu umanu neebe sufisiente, ita la halo jestaun didiak ba rekursu umanu sei afeta ba kazu pendente, “dehan Jurista Sergio ba STL, iha Kaikoli, Dili, Kinta (25/09/2025).
Nia dehan, atu halo redusaun ba kazu pendente maka presiza rekursu umanu neebe sufisiente, no mos halo gestaun ba rekursu umanu neebe iha.
Nia hatutan, rekursu umanu mos faz parte ida neebe halo kazu balu pendente iha Ministeriu Publiku, espera katak tinan ba tinan rekursu umanu nee bele aumenta, maibe servisu inspetoria mos importante kontribui ba redus kazu pendente.
Tanba banhira servisu Inspetoria rigorozu tebes, bele aselera kazu pendente tanba servisu inspetoria hodi deskobre tanba saida kazu nee pendente, no servisu Inspetora nian importante. Tanba nee tau konfiansa ba iha MP atu sira bele halao knaar ho diak, atu redus kazu pendente sira.
Iha fatin ketak, Prokurador Jeral Republika, Nelson de Carvalho dehan, respeita sidadaun sira nia kritika kona-ba kazu pendente, maibe kritika neebe konstrutivu tebes, la iha esplikasaun ida neebe klaru.
“Hau hakarak dehan deit prosesu balu seidauk lao tanba saida, ida neebe difikulta ba ami nia servisu maka sira nia hela fatin lalos, balu mai halo partesipasaun dehan ema ida nee baku hau nia naran alias deit, ida nee buka iha neebe,” dehan nia.
Aleinde nee, Akademiku Universidade Nasional Timor Lorosae (UNTL), Sebastião Dos Santos dehan, publiku neebe hasoru problema hato ona keixa, tau indentidade neebe loos.
“Diak liu maka servisu hamutuk ho autoridade seguransa sira, atu hato indentidade neebe loos, se hatoo indentidade lalos sai mos kestaun ida neebe susar atu indentifika, “dehan nia.
Jornalista: Terezinha De Deus
Editora: Carme Ximenes
