DILI, STLTIMORLESTE.com – Relasiona ho desizaun Tribunal Judisial Primeira Instansia Dili (TJPID) hodi kondena arguidu nain neen (6) ba kazu deskonfia tuda mate Armandino Lemos Soares, husi parte defeza la konkorda sei halo rekursu ba iha Tribunal Rekursu (TR) hasoru desizaun TJPID nian.
“Primeiru desizaun ida nee husi parte Advogadu la aseita, tanba desizaun nee todan liu no la iha ekelibriu, katak iha prosesu krime ida nee lezadu ho nia begraun ida sira grupu ba naok ema nia bibi mak mai fali ema tuda hodi mate,” dehan Advogadu Privadu, Pedro Aparicio ba STL iha Kaikoli, Kuarta (28/01/2026).
Nia hatutan, desizaun Tribunal parte defeza la konkorda, tanba Tribunal dehan ida nee hanesan planu ida, iha begraun nee sira la iha problema, no ida nee akontese hanesan asidente deit, buat ida neebe derepente la iha planu.
Defeza esplika, iha arguidu nain ida bele mos ema seluk neebe iha kalan nee foti fatuk hodi tuda lezadu, tanba fatuk ida tuda kona lezadu monu ho motor hodi mate, arguidu sira la halo tan torturasaun ba lezadu.
Nia dehan, kauza husi lezadu mate husi fatuk neebe tuda no fatuk ida neebe tuda nee husi ema nain ida deit, maibe Tribunal kondena ema nain 6 tama hotu Prizaun. Tanba se aktu nee ema nain ida deit mak halo, lo-loos ema nain ida deit mak tama iha prizaun, nain lima la presiza hetan kondenasaun.
Ho nunee, husi parte arguidu nian la aseita desizaun Tribunal, iha prazu loron 30 nia laran hodi halo rekursu ba iha Tribunal Rekursu (TR).
Antes nee Tribunal Judisial Primeira Instansia Dili (TJPID) liu husi leitura akordaun, deside kondena arguidu nain neen ba iha krime Homesidu Agravadu.
Iha leitura akordaun nee Juiz prosesu Zulmira Auxiliadora deklara katak, faktus neebe konsta iha akuzasaun provadu hotu.
Tribunal deklara, iha sala julgamentu laran arguidu nain lima MX, BdRG, LVS, MAS no HdJF hili direitu nonok, no arguidu CdCSG maka hili direitu koalia, maibe nega ba faktus neebe iha.
Tribunal deklara, Ministeriu Publiku mai ho krime Homesidu Simples, maibe ikus mai alterasaun Kualifikasaun Juridiku ba iha krime omisidiu Agravadu alinha B.
Juiza deklara, maske arguidu nain 5 hili direitu nonok no arguidu nain ida hili direitu koalia maibe nega ba faktus, maibe Tribunal bazeia ba deklarasaun husi sasin sira liu liu ba sasin prinsipal neebe momentu neeba matebian tula, Tribunal la iha duvidas, konsidera katak faktus neebe konsta iha akuzasaun provadu hotu.
Ikus mai koletivu deside hodi kondena pena prizaun tinan sanulu resin hitu (17) ba arguidu CdCSG, no arguidu nain lima MX, BdRG, LVS, MAS no HdJF Tribunal deside kondena prizaun tinan sanulu resin lima (15).
Tribunal mos deklara, arguidu sira atu selu indemnizasaun sivil rihun US$ 6.
Audensia julgamentu nee prezide husi Juiz Koletivu, Ivan Patrocenio, Zulmira Auxiladora, Arjentino Nunes, Ministeriu Publiku reprezenta husi Prokurador Renato Bere Nahac, arguidu sira hetan asistensia legal husi Defensor Publiku Pedro Aparicio.
(ter)
