DILI, STLTIMORLESTE.com – Tribunal Judisial Primeira Instansia Dili liu husi leitura akordaun ba kazu omisidiu Lurumata neebe rezulta Bernadino Ximenes Brito lakon vida, kondena arguidu nain rua (2) ho pena efetivu.
Prosesu ida nee iha arguidu nain ualu (8), maibe iha leitura akordaun nee Tribunal konsidera katak, iha arguidu nain rua ho inisial DM no JS, maka iha indisus forte envolve iha kazu refere.
Ho nunee iha leitura akordaun nee, Kolektivu deside hodi aplika pena prizaun efetivu tinan 9 ba arguidu DM, no pena prizaun efetivu tinan 8 ba arguidu JS.
No Tribunal mos deside aplika pena suspensaun ba arguidu JSS, arguidu LA, arguidu TA, arguidu FA.
No ba arguidu EG, arguidu MS, Tribunal deside hodi absolve total husi krime neebe Ministeriu Publiku akuza ba, tanba konsidera la iha indisus sufisiente.
Lee sai tiha leitura akordaun nee, Tribunal mos fo hanoin atu arguidu sira la konkorda ho desizaun Tribunal nian, bele liu husi sira nia defeza hodi halo rekursu ba iha Tribuna Rekursu, tuir prazu loron 30 sura husi loron neebe Tribunal notifika desizaun ba defeza.
Tuir Advogadu Privadu, Arlindo Shanses dehan, nia parte sei halo rekursu.
Nia hatutan, hanesan defeza ba iha arguidu DM neebe hetan kondenasaun husi Tribunal, defeza sei prepara hodi halo rekursu.
Tuir faktus neebe iha katak, kazu nee akontese iha Lurumata iha loron 13 fulan Maio tinan 2023.
Momentu neebe akontese, no rezulta Bernadino lakon vida.
No arguidu ba iha kazu nee hamutuk nain walu (8), no antes nee iha prosesu primeiru interogatoriu arguidu DM, JS, FA no LA maka kumpri Prizaun Preventiva, no arguidu EG, MS, JSS, LA, TA, FA maka kumpri medida Termo Indentidade Rezidensia (TIR).
Antes nee mos sasin Deliana De Jesus, Fatima De Jesus no Joao Lemos deklara katak, momentu neeba arguidu balu maka iha fatin akontesementu, no balu la iha.
Prosesu nee, prezide husi Juiz kolektivu, Afonso Carmona, Albertina Neves, Maria Solana, Ministeriu Publiku reprezenta husi Prokurador Aderito Tilman, arguidu sira hetan asistensia legal husi Advogadu Privadu, no Defensor Publiku.
Jornalista: Terezinha De Deus
Editora: Carme Ximenes
