AMBENO, STLTIMORLESTE.com – Kazu dengue iha Oecusse sae ba 60, ohin pasiente nain 1 lakon vida tanba mai halo tratamentu iha Hospital Referal Oecusse (HRO) Grave ona, nunee la konsege salva vida.
Informasaun nee hatoo husi Diretora Rejional Saude, Merita Marques Lafu ba STL iha Oecusse, Segunda (23/02/2026) katak, kazu moras dengue iha Oecusse, sae ona ba 60, husi total nee, pasiente ida la konsege salva vida husi pesoal saude sira iha HRO tanba pasiente refere mai husi uma ho kondisaun grave ona.
“Ita iha pasiente dengue ida ohin lakon vida, mate tanba mai iha HRO nia kondisaun grave ona, tanba nee horseik tama Hospital no ohin lakon vida, pasiente nee husi Aldeia Mahata, Suku Cutete, Postu Administrativu Pantemakassar, Rejiaun Administrativa Espesial Oecusse-Ambeno (RAEOA),” dehan Diretora Rejional Saude, Merita Marques.
Iha sikun seluk, Diretora Administradora HRO, Odete Amado Martins dehan loos duni, husi kazu dengue neebe hetan tratamentu saude iha HRO, ohin pasiente ida lakon vida tanba mai iha HRO tarde ona.
“Sim, loos duni, pasiente nee husi Aldeia Mahata, Bairru Kuafeu, Suku Kutete, moras dengue iha loron horseik maibe nia mai iha HRO ho kondisaun grave ona, tanba nee maka husi parte saude la konsege salva vida,” dehan Diretora HRO.
Antes nee nia dehan, relasiona ho kada loron pasiente moras dengue kontinua sae makaas no baixa hamutuk deit ho pasiente bai-bain, tanba nee iha loron Sesta, inisiativa husi Diresaun HRO, muda ona pasiente sira neebe hetan moras dengue iha salaun izolamentu.
“Ita hotu hatene katak, kada loron moras dengue iha Oecusse aumenta ba bebeik, entaun ami husi Diresaun HRO, foti Inisiativa izola pasiente sira husi moras laos dengue, ba baixa iha salaun izolamentu, hodi nunee fo tratamentu ho seriu atu nunee labele hadaet ba pasiente sira seluk-seluk tan, tanba konstrusaun salaun pediatre nee hamutuk ho inan sira neebe partu ho bebe sira mos baixa iha neeba, entaun ami foti inisiativa hodi muda pasiente dengue mai iha fatin izolamentu nee, atu moras dengue labele hadaet pasiente sira seluk iha HRO,” dehan nia.
Nia haktuir tan katak, salaun neebe dadaun muda pasiente dengue nee, uluk governu konstrui ba salaun Aiciu, tanba nee Diresaun HRO buka meus muda sira mai iha fatin nee hodi fo tratamentu saude ba pasiente moras dengue.
(jos)
