DILI, STLTIMORLESTE.com – Tribunal Judisial Primeira Instansia Dili liu husi despaisu ikus aplika medida prizaun preventiva ba arguidu nain 3 ho inisial CCGC, ENPB no JHFG, neebe deskonfia sona lezadu inisial OO hanesan eis trabalhador GMN, maibe parte defeza la aseita despaisu nee no hatama ona rekursu.
“Ami la aseita ho despaisu nee, tanba nee ami halo rekursu hasoru depaisu nee, no rekursu nee ami hatama ona,” dehan Advogadu Privadu, Marino da Cruz ba STL iha Dili, Domingu (20/04/2025).
Nia hatutan, iha prosesu nee hanesan advogadu ba iha arguidu ENPB, hamutuk ho advogadu nain rua seluk hatama hotu rekursu tanba la aseita ho despaisu nee.
Nia argumenta, iha alegasaun sira nia parte husu Tribunal atu aplika medida Aprezentasaun Periodika ba arguidu nain 3, maibe Tribunal entende oin seluk hodi aplika medida Prizaun Preventiva, tanba nee mak sira halo konkorda hodi hatama rekursu.
Nunee, rekursu nee hatama ona iha Tribunal Dili iha loron 15 fulan nee, no Tribunal Dili mak sei haruka ba iha Tribunal Rekursu hodi desidi kona-ba rekursu nee.
Arguidu nain 3 lori mai iha Tribunal, Ministeriu Publiku promove ho krimi omisidiu agravadu ho forma tentada neebe previstu iha artigu 139 Kodigu Penal.
Iha alegasaun Prokurador husu ba Tribunal atu aplika medida Prizaun Preventiva, atu asegura investigasaun hodi provas balu labele lakon. Defeza husu aprezentasaun periodika.
Tuir kronolojia katak, iha loron 12 fulan Abril tinan 2022, iha Matadoru, Aldeia 01 Setembru, Suku Vila Verde, Postu Administrativu Vera Kruz, Munisipiu Dili, akontese problema ida neebe deskonfia arguidu nain 3 sona lezadu ho inisial OO hanesan eis trabalhador GMN.
Prosesu nee.prezide husi Juiz Turnu Jose Quintao, Ministeriu Publiku reprezenta husi Prokurador Renato Bere Nahac, arguidu nain 3 hetan asistensia legal husi Advogadu Privadu nain tolu, Arlindo Sanches, Marinho da Cruz no Napoliao de Olivera.
(ter)
