DILI, STLTIMORLESTE.com – Tribunal Rekursu (TR) hasai ona desizaun hodi altera Medida Prizaun Preventiva (PP) ba iha Medida Aprezentasaun Periodika (AP) ba arguidu nain tolu ho inisial CCGC, ENPB no JHFG neebe deskonfia sona eis trabalhador GMN ho inisial OO.
Antes nee Tribunal Primeira Instansia Dili liu husi despaisu ba prosesu primeira interogatoriu, deside aplika medida Prizaun Preventiva ba arguidu nain tolu, tanba nee parte defeza sira la konkorda hodi hatama rekursu.
No ikus mai Tribunal Rekursu kompostu husi Juiz Deolindo Dos Santos Relator, Juiza Jacinta Corea da Costa, Juiz Duarte Tilman Soares, deside hodi halo alterasaun husi Medida Prizaun Preventiva ba iha medida Aprezentasaun Periodika.
Medida neebe aplika ba arguidu nain tolu atu aprezenta aan iha Eskuadra Polisia neebe hela besik ba, semana ida dala ida iha loron Segunda iha oras tuku 10h00, hodi hein prosesu investigasaun.
“Tribunal hasai ona desizaun ba rekursu nee, hodi altera medida Prizaun Preventiva ba iha Medida Aprezentasaun Periodika,” dehan Advogadu Privadu, Marino da Cruz de Jesus ba STL iha Kaikoli, Tersa (03/06/2025).
Tuir nia, desizaun husi Tribunal nee sai iha loron 27 fulan Maiu, no desizaun sai Tribunal notifika kedan defeza sira.
Antes nee, banhira Tribunal Primeira Instansia halao prosesu primeiru interogatoriu ba prosesu nee, iha alegasaun husi parte defeza nian husu Tribunal atu aplika medida Aprezentasaun Periodika ba arguidu nain tolu. Enkuantu husi parte Ministeriu Publiku husu atu aplika medida Prizaun Preventiva, tanba nee ikus mai Juiz Turnu Jose Quintao deside hodi aplika medida Prizaun Preventiva, tanba nee mak defeza la konkorda hodi hatama rekursu.
No Arguidu nain tolu lori mai iha Tribunal, Ministeriu Publiku promove ho krimi omisidiu agravadu ho dorma tentada neebe previstu iha artigu 139 Kodigu Penal.
Tuir kronolojia katak, iha loron 12 fulan Abril tinan 2022, iha Matadoru, Aldeia 01 de Setembru, Suku Vila Verde, Postu Administrativu Vera Kruz, Munisipiu Dili, akontese problema ida neebe deskonfia arguidu nain tolu sona lezadu ho inisial OO, hanesan eis trabalhador GMN.
Prosesu primeiru interogatoriu prezide husi Juiz Turnu Jose Quintao, Ministeriu Publiku reprezenta husi Prokurador Renato Bere Nahac, arguidu nain tolu hetan asistensia legal husi Advogadu Privadu nain tolu, Arlindo Sanches, Marinho da Cruz de Jesus, Napoliao de Olivera.
(ter)
