DILI, STLTIMORLESTE.com – Relasiona ho kazu neebe akontese iha Ermera, Gleno, Sabadu (07/02/1016) foin lais nee, hodi halo vitima nain 2 hetan kanek iha parte ulun, oras nee daudaun vitima ida neebe kanek todan halao hela tratamentu saude iha Hospital Nasional Guido Valadares (HNGV) no nain 1 seluk neebe kanek kmaan iha Sentru Saude Munísipiu Ermera.
Diretor Sentru Saude Munísipiu Ermera, Antonio de Deus Fatima hatete, vitima nain 2 nee, nain 1 rujuk bá Dili tanba kanek todan, no ida seluk mak halo hela tratamentu iha sentru saude Munísipiu nee nian. Tanba kazu nee iha rua, nain ida taa iha ulun kuak rua mak 8 cm no 7 cm, klean 1 cm no suku ho kabas 10 bá leten.
“Vitima ida neebe kanek todan nee, iha loron Sabadu nee kedas transfere bá Dili, tanba kuak 2,” dehan nia bá STL liu husi telefone husi Gleno, Segunda (09/02/2026).
Nia hatutan, kona-ba vitima ida seluk, tanba kanek kmaan halao deit tratamentu iha nee.
Iha sorin seluk wainhira diariu nee halo kontaktu telefone ho Komandante Munísipiu Ermera, maibe la atende.
Entretantu tuir informasaun neebe viral iha media sosial katak, kazu taa malu nee akontese iha Munísipiu Ermera, Gleno-Eraulo no iha akontesimentu nee halo vitima nain rua hetan kanek iha ulun.
(dom)
