DILI, STLTIMORLESTE.com – Tribunal Judisial Primera Instansia Dili halao despaisu ikus ba prosesu primeiru interogatoriu neebe deskonfia komete husi arguidu nain lima (5).
Ba prosesu ida nee, Ministeriu Publiku promove arguidu nain lima ho inisial, ABM, AMS, OSR, DS, CGL, mai iha Tribunal ho krime danu simples, tanba deskonfia estragus kalen iha Kampu Bekora nian.
Halo tiha identifikasaun ba arguidu sira, iha despaisu ikus loron Kuarta (04/12/2024), Juiz Turnu Zulmira Auxiliadora desidi aplika medida Termo Indentidade Rezidensia (TIR) ba arguidu nain tolu (3) ho inisial AMS, ASM, OSR, no arguidu nain rua (2) ho inisial DC no CGL, Tribunal desidi liberta total.
Hafoin despaisu, defeza arguidu sira nian Defensor Publiku, Marsal Mascarinhas dehan, detensaun lo-loos ba arguidu nain tolu (3) deit.
“Husi arguidu nain lima (5) nee detensaun lo-loos ba arguidu nain tolu (3) deit, nain rua (2) nee ba vizita sira nia kolega iha Polisia mak hatama tan sira nain rua (2) ba sela laran,” dehan Marsal ba STL iha Tribunal Dili, Kuarta nee.
Nia hatutan, nain rua (2) liberdade total, nain tolu (3) nee mak aplika TIR ba sira hodi bele kolabora ho Ministeriu Publiku atu investigasaun bele lao ba oin.
Nia esplika, arguidu sira lori mai Tribunal, tanba dun ba sira estraga kalen neebe didin iha Kampu Bekora nian no dun mos ba sira tuda ema seluk, maibe sira dehan laos sira mak tuda.
Iha alegasaun Ministeriu Publiku, Prokurador Ozorio De Deus husu Tribunal atu aplika medida aprezentasaun periodika no TIR ba arguidu, no enkuantu husi parte defeza husu Tribunal atu fo liberdade total ba arguidu sira, tanba sidadaun balu kaer uluk tiha arguidu sira mak entrega ba Polisia.
Maibe Tribunal konsidera, detensaun nee sei tama iha flagarante delito, hodi aplikaTIR ba arguidu nain tolu (3), no nain rua liberta total, tanba sira nain rua (2) ba vizita sira nia kolega no Polisia dehan sira nain rua (2) lao hamutuk ho arguidu nain tolu (3) tau mos sira iha sela.
Hanesan defeza, nia parte aseita ho despaisu neebe aplika ba nia kliente, tanba nee sei la halo rekursu.
Prosesu primeiru interogatoriu nee prezide husi Juiz Turnu Zulmira Auxiladora, Ministeriu Publiku reprezenta husi Prokurador Ozorio de Deus, arguidu sira hetan asistensia legal husi Defensor Publiku, Marsal Mascarinhas.
(ter)
