DILI, STLTIMORLESTE.com – Ministeriu Publiku (MP) iha alegasaun ba krime Falsifikasaun Dokumentus no Burla Agravadu, solisita ba Tribunal atu kondena arguidu DCB, no apresia deklarasaun arguidu inisial JDJL.
Iha alegasaun Prokurador Domingos Barreto deklara katak, arguidu DCB perante julgamentu deklara katak, nia parte mak ba rejista naran no simu duni osan.
Prokurador deklara, iha sala julgamentu arguidu deklara katak, arguidu la iha konhesimentu kona-ba falsifikasaun dokumentus, maibe arguidu mak iha inisiativa hodi falsifika dokumentus.
Kona-ba arguidu JDJL, Prokurador deklara katak, arguidu ba rejistu tuir regra neebe iha no la simu osan husi arguidu DCB.
Prokurador deklara tan, testemunha neebe Tribunal rona deklara katak, arguidu DCB falsifika dokumentus no simu osan neebe laos arguidu nia direitu.
Tanba nee Prokurador mantein ho akuzasaun neebe iha, husu Tribunal atu kondena arguidu DCB prizaun tinan 5 efetivu. Husu mos Tribunal atu kondena arguidu selu indemnizasaun sivil ho osan rihun US$ 31 neebe arguidu foti tiha ona.
Ba arguidu JDJL, Prokurador husu Tribunal atu apresia deklarasaun sira hodi foti desizaun.
Enkuantu defeza arguidu DCB nian, Deomentino Morais husu Tribunal tetu deklarasaun sira hotu atu aplika pena neebe justu ba arguidu.
Defeza arguidu JDJL, Advigadu Cansio Freitas husu Tribunal absolve arguidu husi krime neebe imputa ba nia, tanba arguidu la envolve iha krime nee.
Rona tiha alegasaun, Tribunal adia ba loron seluk hodi rona desizaun.
Iha indisus sufisiente katak, iha tinan 2008 Komisaun Asuntu Antigos Kombatentes assunto Veteranos FALINTIL (CAAC-CACF) inisia hikas rejistu martires sira neebe mate iha funu laran hodi hetan Pensaun Sobrevivência.
Hafoin anunsiu nee, servisu Asuntu Veteranu FALINTIL (CAAC-CACF) Pensaun sobrevivência hahu simu rekerimentu husi ema nain haat (4) neebe rekere atu hetan direitu nee ba Martir Mauleto neebe rejista ho numeru MFAA06266 hanesan ho naran inisial JdJL, ACG no DCB.
Hafoin halo selesaun ikus mai alista naran katak, arguidu DCB mak hetan atribuisaun ba Pensaun Sobrevivência Martir Mauleto neebe regista ho numero MFAX05256. Arguidu JdJL neebe iha ligasaun parentesco Martir Mauleto hanesan Maun alin (arguidu nia aman nia maun nia oan mak martir Mauleto) labele hetan ona tan nia rasik hetan ona ninian mos.
Tuir mai naran hirak nee alista ba publiku no posibilidade atu reklama ona kontesta iha loron 30 nia laran iha sede suku sira, Postu Administrativu hotu iha Munisipiu Likisa.
Tanba la iha reklamasaun ou kontestasaun hanesan Komisaun Homenajen Servisu registo (CHSRR) nia haruka kompleta tan dokumentu ba segunda via, hodi bele inisia nia pagamentu iha inisiu fulan la-lembra iha tinan 2013, inisia transferensia pagamentu dahuluk ba rekerente arguidu DCB, liu hosi BNU no montante osan USD 14.320 no tuir mai mensalmente hahu fulan Desembru tinan 2013 rekerente simu osan ho montante USD 230 amerikanu.
Iha faze Komisaun Homenajen Servisu registo (CHSRR) nia haruka kompleta tan dokumentu ba segunda vez arguidu DCB, neebe akompana husi arguido JdJL, desloka ba iha Notariado Ermera hodi falsifika sertidaun Nascimentu arguidu muda nia sertidaun hanesan, arguidu DCB mak oan rasik husi Martir mauleto.
De faktu arguidu DCB, nia aman no inan nia naran mak hanesan, naran Calistro Correia no Laurinda Babo.
Hafoin Komisaun omenajen Servisu registo (CHSRP) hetan informasaun nee hahu tinan 2019 hapara pagamento ba arguidu DCB.
Tuir deklarasaun husi arguidu DCB katak, hahu iha 2013-2019 sira simu hamutuk us 31.000 americano osan hirak nee sira nain 2 fahe.
Arguidus sira DCB no arguidu JdJL, halo ho forma livre, deliberada no konsientemente ho intensaun kauza prejuizu ba ema seluk ou ba estadu hodi obta ba nia ou ba ema seluk benifisiu lejetimu hodi halo dokumentu ou notasaun teknika falsu, falsifika halo falsamente dokumentu no uza dokumentu nee hodi habosok estadu hodi simu osan neebe ema seluk nia direitu.
Nunee konstitui arguidu DCB no arguidu JdJL hanesan autor material 1 falsifikasaun Dokumentus Publiku no krime Burla Agravadu neebe previstu iha artigu 303, 304 e 266-267 husi kodigu Penal.
No pedidu Indimizasaun sivil, Ministeriu Publiku reprezenta BNCTL (hanesan vitima) iha termus artigu 71 i 72 husi KPP, artigu 132 husi Konstituisaun RDTL, artigu 3 Estatutu Ministeriu Publiku, lei 14/2005, 16/09, mai deduz Pedidu ba indiminizasaun civil hasoru demandadu.
Reu, Estado RDTL Diresaun Comisao Homenagen Serviso Registo e recurso (CUSRR ), reklama ho titulo ba DCB no arguido JdJL tenke rekopera/devolve fila fali prejuizo no valor us osan US$ 31.000 iha ezekusaun ba sentensa.
No kuantia sira nee, sei akresida mos ho juru demora vencidu husi loron ba pratika faktu ilicitu sira iha leten to integral pagamentu.
No Pedidu indiminizasaun ho nia fundamento legal tuir artigu 417 husi Kodigu Civil RDTL nian.
Audensia julgamentu nee, prezide husi Juiz kolektivu, Julmira Auxiliadora, Ivan Patrocenio, no juiz estajiariu nain-ida, Ministeriu Publiku reprezenta husi Prokurador Domingos Barreto, no arguidu nain rua hetan asistensia legal husi Defensor Publiku nain rua, Diamantino Amaral no Cancio Freitas.
(ter)
