DILI, STLTIMORLESTE.com – Ministeriu Publiku iha loron Kinta nee halao alegasaun ba kazu neebe envolve husi Funsionariu Komisaun Anti Korupsaun (KAK) nain rua (2) ho inisial EFQ no FFLEGG kona-ba violasaun segredu justisa.
Iha alegasaun nee, Prokurador Gustavo da Silva deklara katak, bazeia ba arguidu sira nia deklarasaun iha sala julgamentu katak, faktus neebe konsta iha akuzasaun provadu.
Prokurador haree katak, arguidu nain rua konfesa ba faktus, ho nunee Prokurador desidi husu ba iha Tribunal atu tetu deklarasaun sira hotu, hodi aplika pena tuir konviksaun Tribunal nian ba arguidu EFQ, tanba hanesan Xefe Investigador KAK, no husu Tribunal atu aplika justisa neebe justu ba arguidu FFLEGG, tanba nia hatun notisia bazeia ba orientasaun husi Superior sira.
Enkuantu iha alegasaun nee, defeza husi arguidu nain rua nian husu ba Tribunal atu aplika pena Admoestasaun ba arguidu EFQ, no absolva arguidu FFLEGG.
Rona tiha alegasaun, Tribunal adia ba loron seluk hodi rona desizaun.
Tuir akuzasaun neebe iha katak, arguidu EFQ nuudar investigador iha Komisaun Anti Korupsaun (KAK), nudar xefe unidade investigasaun dezde tinan 2012.
Arguidu FFLEGG nuudar funsionariu KAK, nuudar midia ofisial, no halao nia knaar dezde tinan 2012.
Iha loron 17 fulan Outubru tinan 2022, maizumenus tuku 8:00 dader, arguidu EFQ nuudar xefe ekipa, ezekuta despaxu tribunal nian katak, mandadu buska no apreensaun relasiona ho prosesu investigasaun NUC 0016/21.CACTL no suspeitu maka FMCPJ aktual Ministru MAPKOMS, neebe iha hela faze investigasaun.
Iha faze ezekusaun iha loron hanesan, maizumenus tuku 8:51 dader, arguidu FLEG, nuudar ofisial imprensa KAK nian, publika iha pajina Facebook CAC nian artigu relasiona ho prosesu nee ho konteudu hanesan tuir mai nee, Breaking News, KAK kontinua halao Buska no Apreensaun ba Kazu Set-top Box RTTL, EP iha MAPKOMS Gabinete Palasiu Governu.
Maizumenus tuku 09:53 nia hetan instrusaun husi arguidu EFQ atu blokeia (apaga) notisia neebe temi ona, no blokeia tiha.
Hafoin ezekusaun mandadu, iha loron tuir mai tuku 09:00 arguidu ba kazu sira neebe temi ona hetan notisia neebe publika husi midia sira, hanesan midia Tatoli no Smnewstl, no sente ofendidu no prejudikadu.
Publikasaun iha loron 17 fulan Outubru tinan 2022 iha midia Tatoli iha loraik, hatoo Komisariu CAC nia komentariu sira.
Publika iha loron 18 fulan Outubru tinan 2022, maizumenus tuku 09:00 iha midia Smnewstl, entrevista ida ho MAPKOMS.
Arguidu EFQ publika iha nia pajina Facebook kopia mandadu buska no apreensaun no komentariu sira seluk hanesan sita atu koor ida mos nein pasu ida atu hatene hau nia profesionalizmu nuudar ajente neebe halao lei iha ordem.
Arguidu EFQ nuudar investigador dezde 2010, iha kapasidade no konhesimentu kona-ba prosedimentu no padraun investigasaun nian.
Arguidu FLEGG nuudar ofisial imprensa iha KAK dezde tinan 2012, no iha kapasidade no konhesimentu ba materia publikasaun iha midia no nia limite, hanesan sira neebe relasiona ho segredu justisa nian.
Aktu publikasaun neebe arguidu sira halo refere hotu ba buka prova relasiona ho prosesu neebe investiga hela iha investigasaun NUC.0016/21.CACTL, iha neebe suspeitu maka FMCPJ, tanba nee iha segredu judisial nia okos.
Sira hatene nuudar funsionariu KAK nian katak, partisipante prosesual sira neebe tama iha kontaktu ho prosesu labele fo sai ninia konteudu ka aktu prosesual sira neebe kompoin prosesu nee.
Sira hatene katak, sira nia hahalok hetan bandu no hetan kastigu hosi lei kriminal.
Ba buat sira iha leten, sira komete, iha ko autoria material, iha forma konsumadu, krime Violasaun ba Segredu Justisa, husi artigu 291 no artigu 74 husi Kodigu Prosesu Penal.
Hatan ba akuzasaun neebe iha, arguidu EFQ deklara katak, faktus neebe iha akuzasaun loos hotu katak, buska neebe halao iha loron 17 fulan Outubru tinan 2022, iha Gavinete MAPKOMS.
Arguidu rekonhese katak, mandadu buska nee arguidu mak lidera, no kona-ba publikasaun primeiru iha pajina KAK nian, arguidu mak haruka atu hamoos tiha.
Arguidu deklara, publikasaun segundu hodi responde kona-ba FMCPJ nia entrevista neebe halao ho media sira, hodi deklara dehan nia parte hanesan sasin, tanba nee defende Instituisaun nia naran arguidu mos haruka publika iha pajina facebook KAK nian katak, mandadu buska legal.
Audensia julgamentu nee, prezide husi Juiz Singular, Jose Gonsalves, Ministeriu Publiku reprezenta husi Prokurador Gustavo da Silva, arguidu hetan asistensia legal husi Defensor Publiku Marsal Mascarinhas.
(ter)
